Joernaal van Jorik

DJ Opperman

Joernaal van Jorik

Tafelberg

Die uitleg van gedigte in hierdie digitale uitgawe van Joernaal van Jorik mag verskil van dié van die gedrukte uitgawe, afhangende van die instellings op u leestoestel. Die uitleg vertoon optimaal indien die standaardinstelling op u leestoestel gebruik word. Lesers kan egter eksperimenteer met die instellings vir verskillende perspektiewe op die gedigte.

Duikboot

WAAR WARRELWINDE UIT NAGHEMELS MAAL

en waaireëns oor die see uitsak, verlig

die magnesiumdraad van ’n weerligstraal

’n duikboot wat soos die aarde verdig

uit die baaierd beweeg. En vóór die vloed

van golwe hom raak, klap die staalluik

toe, en hy kantel sy vinne en snoet

skuins in die skuimende waters – duik

met ’n borrelbaan langs kuwe en kante

deur die reie vlugtende engelvisse

tussen heup en heup van twee vastelande

in ’n waterbuik se geheimenisse

bo die kopbeen en die gebarste klok

van matrose en ryke lankal vergaan;

maar die see is ’n ewige eierstok

en ryke groei met die groeiende maan.

En stil in die warm ruim se klare

lig, wat melkig straal in die klein kajuit

oor motors en meters en koppelare

in holtes deur ’n dun staalvlies omsluit,

waar Manuel, die lang skraal skipper

met die hol gesig en die bietjie baard,

blou vonke volg wat oor skakels flikker,

die pyltjies wat roer, en die koers op die kaart,

en Dabor, die dikke, die tweede man,

die snorkels stel en sy bors uitstoot,

sy arms rek soos hy gapend ontspan,

en die hartslag halfoor volg van die boot,

lê Jorik in ’n opklapbed en slaap . . .

tót die Dikke hom knyp dat hy wakker

ruk en verward uit ’n droom ontwaak . . .

die motors en meters en elke makker

herken, maar ligsku sy oë weer sluit,

en bid: ‘Ek wat U weë nie verstaan

en nie geken word in U raadsbesluit

maar slegs beveel word in ’n kom en gaan,

verlang reeds in die vrot lug van dié boot

terug na die heuwels van my vaderland;

maar eenmaal op reis drie duim van die dood