Ntshebele 1

1

Ga Ke A Swanela Go Phela

Sagoloka o ile a tseba nnete ya bobedi. Nnete yeo o e tsebile mohla mmagwe a etetšwe ke mogwera wa gagwe wa bohloko. Nnete yeo o ile go e tseba lefase la mo hlanamela.

Wena thaka o a ipshina o na le mothepana šo o a go hlokomela,ke Mologadi.

O ra yo ngwanenyana Sagoloka? Ge ke gopola ruri gore Sagoloka ke ngwana yo a tlilego ke sa mo emela, ke re ke sa mo nyake … nxa, o a tseba dilo di a direga mokgotse, gwa realo Mpepu go kwagala gore o a fegelwa.

Ge ba bolela ba realo Sagoloka o be a eme ka ntle ga mojako ba sa mmone. Ngwana o ile go kwa mantšu a, a se tsebe gore a reng. Gape o be a eme ka threi mojako a sa tsebe gore a gomele ka khitšhing goba a tsene naa? Mogopolong wa gagwe o be a re ge ba ka lemoga gore o kwele mantšu ao a bona ba tlilo itheng. Ga a sa nyaka go lebanya mahlo le mmagwe- yo a bego a sa mo nyake. Na gonabjale gona o a mo nyaka? O betile pelo ngwana wa batho a ba išetša teye. Le ge ba mo reta ka direto ga se a kwa selo ka ge a be a nyaka go tloga moo pele ga bakgotse ba babedi ka pela.

Nnete ye Sagoloka a e tsebago ke gore mmagwe le tatagwe ba hlalane. Nnete ye a e tsebago ke gore tatagwe e sa le a ba tlogela yena e sa le lesea ga se a ka a monna. Mmagwe ga se a ka a mmontšha le ge e le senepe sa tatagwe ka ge a be a fela a mmotša gore ka mokgwa wo a mo tennego ka gona ga a nyake le go kwa sefane sa gabo se bolelwa. Nnete ye nngwe ke go re yo ba dulago naye a re ke tate, ga se yena. Bjale lehono go gorogile nnete ye nngwe – nnete ya go galaka.

O fihlile mo a bego a apea gona a ema phoo! O išitše monagano kua le kua dikarabo a di hloka. Ke ka lebaka lang mmagwe a be a sa rate ge a belegwa? A e ka ba ka mathata ao a bilego nao le tatago Sagoloka goba …? Leina la Sagoloka lona o le filwe bjang go itaetša gore ga go selo se se lokilego? Ge e ba mmagwe ga a mo rate nka a se a mmolaya a sa le madibeng goba ge a seno belegwa?

Pelo ga e na tšhiwana. Ditaba tše ka moka di ile tša roba pelo ya Sagoloka. O ile a hlaba mokgoši gatee a napa a kitimela kamoreng ya gagwe ya go robala, a itahlela mpeteng, a lla gabohloko, megokgo le ditshwimina di be di kopakopane. O be a phethogela ka mo le ka mo ka mapaing a hloka karabo mantšung a mmagwe. Pelo ya gagwe ke yona e bego e le bodibeng bjo bosoboso ge a gopola gore o tlile ka lapeng leo a sa nyakege. Lebaka le tsebja ke mmagwe eupša ga se a ka a mmotša lona.

Bale ba babedi ba be ba sa lemoge selo ba ile le magang a segwera. Ba be ba sega, ba bolela go se na le molato. Ba ile ba tlo phafoga ge dinko di ba botša gore dipitša di a swa. Ge Mpepu a fihla ka khitšhing a re Sagoloka o kae, ngwana a re o tlo ntšea kae. O ile a imologa ge a mo humana ka kamoreng ya go robala le ge a makaditšwe ke maemo a re šetšego re boletše ka ona. Sagoloka o ile go kwa lentšu la mmagwe a napa a gowa ka lentšu le legolo le bile le hlatlaganyetša ke mantšu a go re mmagwe a mo tlogele ka khutšo. Ke mathomo Sagoloka a itshwara ka tsela ye pele ga mmagwe. Le ge Mpepu a kwele ka pela gore ditaba di na le yena, nakong ye o be a sa tlelwe ke mogopolo wa gore gabotse o sentše ge a etla kae. Ka bogolo o ile a ipoelela dipitšeng le go Mologadi ka lehutšo la gore ke maaka Sagoloka o tla potliša pelo ba rarolla kgang yeo ge moeng a šetše a laetše.

Athefa dikgolo di be di sa tla. Mpepu o rile ge a re ke išetša morwedi dijo a humana a beile pampiri ya ‘DON’T DISTURB’ ka ditlhaka tše kgolo mo lebating. Mafelelong Mpepu o ile a se sa kgotlelela. Gape bošego bjoo bo be bo fapana le a mangwe. Go be go le bodutu go kwagala gore Sagoloka ga a gona. Matšatši ka moka e be e le a mašata ge ba le babedi ka moo ngwakong. Go a segwa, go a opelwa le dipotšišo tša go tsenelela ge Sagoloka a nyaka go tseba se le sela go mmagwe. Bjoo bošego go be go rile tuu, go šila bjoko fela, mongwe le mongwe o swere leeto la mogopolo le le sa felego.

Mpepu o rile ge a re ke kokota mojako go botsiša morwedi gore ga a je naa, ya ba sela sa mosegare gape sello se segolo le mantšu a go re a mo tlogele ka khutšo. O tla reng motho wa batho. O ile a ipoelela sofeng a itulela gona a sa tsebe gore a ka thušwa ke mang. O be a tshwenywa fela ke go nagana gore Sagoloka a se tlo itira bošula. O be a sa khutše go nanabela a yo hlodimela ka moo morwedi a inotleletšego ka gona ka lešobana la khii. O be a dio re ehu le go leboga Mmopi ge a mmona a dutše goba a khuname goba a bala se sengwe go le molaleng gore leeto leo ba le swerego la go se robale bošego ka moka ba tlilo le tšea mmogo. O be a bea dithapelo go Mmopi a sa fetše gore hle nke ngwana yoo a se itire bošula. Bjo ke thaba.

Ge bo esa go be go le molaleng gore Sagoloka o be a sešo a buša pelo mme o be a sa rate go bolela le mmagwe le ge a be a latela ditaelo tša gagwe ka setu. Mmagwe o ile a no beega pelo ge a bona gore aowa sekolong gona o a ya. Ka morago mmagwe le yena o ile a tšewa ke tša letšatši ka lehutšo la gore mantšiboa gona le ge ba reng Sagoloka o tlo boa a bušitše pelo mafiša Mpepu le yena o kgona go kwa gore e lego bothata ke bofe.

Mpepu o ile a ba le maseme ge a humana mathapameng ao ntlo e sa tswaletšwe go se na bophelo ka gae. Ka mehla Sagoloka ke yena a tšeago khii go baagišane le go thoma ka medirwana ye mengwe ka ge mmagwe a atiša go boya morago ga gagwe ge a ile matogong ka toropong.

E rile ge leswiswi le swara Mpepu a napa a se sa dudišega ka ge a lemoga gore bothata bo be bo thoma go agela e le ruri. O ile a botšiša gohle moo a bego a tseba a ka kwa se sengwe ka ngwana wa gagwe ba mo latolela. Le ge a be a sa kgolwe gore Sagoloka a ka ya melokong ya kgole le yona o ile a ba botšiša le go ba tsebiša se se mo hlagetšego. Le go ba tsebiša fao o be a le megokgong a šomiša mogala wo o lego mo seterateng sa gagwe. Ba bangwe o be a sa tsebe dinomoro tša bona tša mogala, tše dingwe