Naga Ga Di Etelane

Pukwana ye ke segopotšo go mmagobanake, Mamakhudu Eunice Serudu, Mosebjadi wa Batlhalerwa, Hunadi yo mošwana, yoo a ilego a ntumelela go tlogela legae la rena go yo hlodimela lephelo le metsinkelo ya ditšhaba di šele. A ikgafela go šala a gokaretše mafotwana a rena. Gola o kake tlou ngwana wa Batlhalerwa.

Nka lebala bjang tate, Thomo ya mekgoro, ntshokatiba kgotlopo senatla sa boMmamonyana le Raisibe o mošwana, Mošopšadi wa Matebale ngwan’a Aphane ’a Moreku, bao ba ilego ba itima tša bophelo go mpha lehumohumo thuto. Robalang ka khutšo le bagologolo, nka se le lebale.

Malebo

Ke leboga Profesa P.C.M. Mokgokong, Rabadia wa Sesotho sa Leboa Yunibesithing ya Lebowa, le Morena C.K. Nchabeleng wa lekala la Maleme a Basotho Yunibesithing ya Afrika-Borwa, ge ba ile ba bala pukwana ye pele ga ge e gatišwa gomme ba ntshwaya diphošo le go mpha maele a bohlokwa. Golang le lekane le tlou, tšhukudu e be mošemanyana. Le e hlabane bana ba Thulare. Madimabe ke ge bobedi bo šetše ba iketše boyabatho. Robalang ka khutšo, bana ba Thulare! Nka se tsoge ke le lebetše.

Babapadi

Mphaka: Mofaladi wa go tšwa Bonwatau

Hunadi: Mohumagadi wa gagwe

Sebola: Morwa wa bona

Raisibe: Morwedi wa bona

Akitse: Modiredi wa bona

Tokari: Mogwera wa Mphaka wa mofahloši Takone

Mbari, Rola, Kala: Banna ba Takone

Mookamedi wa thuto: Takone

Nkono: Morutiši Letsheng la Mogadisho

Lebitsi: Moithuti wa go tšwa Bonwatau

Ntlhore: Tonakgolo ye mpsha ya Letsheng la Mogadisho

Letsota, Otše: Matsogo a Ntlhore

Karolo Ya Pele

Tema ya 1

Ge seširo se bulega Mphaka o bonala a dutše setulong ka phapošing ya gagwe ya go bala, a ageleditše hlogo ka diatla tšeo dijabana tša tšona di tsemilwego godimo ga tafola boka ditshegana. O a balabala ebile lentšu la gagwe le kwala le ka moraleng, moo Hunadi le Raisibe ba lego gare ka medirwana ya lapa.

MPHAKA: (O bolela a nnoši) Ke be ke lebanwe ke kgetho. Tsela di be di le phakgapedi! Na ke be ke swanetše go hwa ke sa phela? Ke bitlelwe ke ipona? Aowa! (o šišinya hlogo) Le nna ke be ke nyaka Go swana le mantho a mangwe. Ke tšhaba go šilaganywa le go foufatšwa kgopolo ke itebeletše Ke boifa go hupetšwa sehutamoya sa moya wa ka; Go hlalana le dikgopolo tša ka tše nanana, Tšeo go thwego ke meetlwa go bangwe. Bana ba ka bona ke be ke tla ba lesa bjang Ba enwa meetse a tsebo sedibaneng se fatilwego ke bangwe? Botho bja ka ka moka bo thennwe boka kgapa yeo peu ya yona, E sa hlwego e nyakwa! Ke kitelwe dijo ganong, Ke re ke betola ba re o a nyankga O itshema mothonyana moisa te! (O itia tafola ka letswele) Matlakane a ntswetše! Ka bontšhwa lehu ka mahlo Ke sa bolaya motho! Aowa, go kgetha gona ke be ke tlamegile. Go kgetha tselapeding tše. Go tšwa ka difate tša borare, Go yo tsoma mafulo a matala dileteng tše dingwe. Go iphetoša moneneri, mosepedimajaditala Go ena le gore ke binele sefogojane sa komašele. (O ribega hlogo tafoleng) Go bohloko bjang go kgaolelwa lešika la meloko! Go ahlogana le dithakangwaga tša gago ke polao Go hwela ditšhabeng ke bogoboga; Eupša ke be ke lebanwe ke kgetho –Kgetho tselapeding tše … (Go kokota motho lebating) Gore botho bja ka bo se tle bja thakgolwa Ke kgethile go tšwa ka difate – mohlomongwe go tšwela ruri, Go ya moo ke tlogo fiwa tlotlo, Ka phela, ka phediša le ba ka … (Go kokota motho lebating Mphaka o tsoša hlogo)

HUNADI: (O tsena a kukile matswalo a makaditšwe ke ge Mphaka a bobola a sa fetše.) O hloma bjang na tholo?

MPHAKA: O ra ge ke reng? (O mo lebeletše ka mahlong.)

HUNADI: (O mo tsepeletše ka mahlo.) O reng wa bolela o nnoši?

MPHAKA: (O inamiša hlogo.) O nkwele ge ke reng mosadi tena?

HUNADI: Ao, mogatšaka, o reng wa ikgakantšha o le kaaka?

MPHAKA: (O a mo gerula.) Se mphate diganong mosadi towe.

HUNADI: Ruri, bogolo bo a tshwenya. Ge o šetše o bobola bjale o sa thoma go tšhela moriri o mošweu, ge o eya go swara lehlotlo gona go tla ba bjang?

MPHAKA: A nke o tlogele go mpea dipataka motho wešo. O feletšwe ke modiro ke a go bona.

HUNADI: (O mo lebeletše mahlong.) Ke gore o tloga o gopola nke re be re sa go kwe ge o balabala bjale?

MPHAKA: (O mo utswa ka mpa ya leihlo.) O re ke balabala?

HUNADI: Eng, ke realo.

MPHAKA: Nxa! O tla mpolediša kudu mosadi ke wena.

HUNADI: Ge o sa nkgolwe e re ke bitše Raisibe, ka gore ke yena a tlilego a mpotša gore tate o bolela a nnoši.

MPHAKA: Ke gore ge le le ka kua moraleng le theeleditše seo ke se bolelago? Ke gore le ntshema segafi?

HUNADI: Se re gwaele rena. E le mang yo a rego o segafi?

MPHAKA: Matlakane a maso! Mosadi yo o reng! O sa tšo re ke be ke balabala, eupša o re ga ke segafi. O šupang ge o realo?

HUNADI: (O bolela ka boleta.) Aowa, papa, ge ge go na le se se go tshwenyago pelong o ka napa wa šitwa ke go mpegela ke le mogatšago?

MPHAKA: (O a mo fotlela.) Gageno segafi se tseba ditaba?

HUNADI: Ga se wena yo re kwelego o re o gapeleditšwe go tloga?

MPHAKA: Go tloga kae?

HUNADI: Nka tseba bjang ka gore o be o bobola bjalo ka nose!

MPHAKA: (O kgathola mahlong.) O itote Hunadi, se re ke be ke bobola bjalo ka nose. O sa šupa gore ke hlarediahloga?

HUNADI: (O a ngaletša.) Ge o gana go mpotša se se go tlaišago moyeng, gona ke le mogatšago, o tla šala o bobola bjalo o nnoši. E re nna ke yo bona dipitša tša ka.

MPHAKA: Ntšhiroge ke šale ke bobola ke nnoši, ka gore ke sebobodi se se se nago tlhaloganyo! Nxa, basadi! Motho o no go ferehla megopolo o iketlile go se molato … (Raisibe o a kokota.)

HUNADI: E re ke tloge, re tla be ra hwetšwa ke batho mo re bolela se sa bonagalego. (O a ema o leba lebating o gahlana le Raisibe a swere mangwalo.)

RAISIBE: Mangwalo šea mma. Le lengwe o ka re le tšwa go bokoko.

HUNADI: (O fapana le yena.) A fe tatago ngwanaka. (O a tšwa.)

RAISIBE: (O tsena ka phapošing ya tatagwe ya go ngwalela.) Tate mangwalo šea.

MPHAKA: Ke lebogile Mošopšadi. A tlile neng?

RAISIBE: Raposo o sa tšo tla gonabjale o bile o sepetše.

MPHAKA: Ke lebogile ngwanaka, o ka sepela. (O nyakorela mangwalo a gagwe.) Bjo bona bo reng nke bo ile bja bulwa ke motho? Ekaba ba be ba nyaka eng go bjona? (O a bo bula gomme semamaretši se fo bulega gabonolo.) Matlakane! Bjo bona bo be bo butšwe. Na ba be ba tsoma go kwa eng? Ruri motho o ka se mo fetše. Mola ke re ke gatogile ditao. Ke sa ntše ke šetšwe morago. E re ke ba le maganogano a a bona.

Tholo

Re a tamiša tshehla ya legola. Rena mono gae ga Mmabolepu re sa thakgetše. Seo se re tlaišago ke go le hloela fela.

Mengwaga ye meraro ye re sa go bone e šetše nke ke e lesome.

Batlogolo ba gago ba šetše ba thomile go go lebala. Hle, Tholo nke o re romele seswantšho sa gago le bana re tle re kgone go fela re le gopola ka sona.

Tša mono di sa retetše fela lehutšo le kaka legonono. Bokamoso bo šišitše o ka re bo tla re hlabišetša leo re tlogo go le orela le ge re šetše re le melora. Batlogolo bona ba tla gata tala e bola.

Ntumedišetše bana hle, Tholo.

Mmago,

Pebetse a Monare.

(O a le phuthaphutha mme o tšwa ka ofising ya gagwe a bitša.)

Hunadi! O gokae mogatšaka. (Ga go phetolo.) MmagoRaisibe ke re o go kae! Ga o tle wa kwa ditaba tša gae? (O rarelela ka moraleng.)

MPHAKA: (O fihlile ka moraleng.) Ao, mmagoRaisibe, ke reng ka re ke go bitša wa nkhomolela?

HUNADI: (O kgathotše mahlong.) Ke gona ge o mpitša ge o nkgoelela bjalo ka lethumašana?

MPHAKA: Afaeya, ge ke go bitša bjalo ke gona ge ke go goelela!

HUNADI: (O tšwela pele ka mešongwana ya gagwe ga a mo hlokomele.) O lokolotše pelo bjale ya go mpolediša?

MPHAKA: (O maketše.) O hloma bjang na mogatšaka?

HUNADI: Nka re ke le mogatšago wa šitwa go mpadiša tšeo di babago pelo ya gago?

MPHAKA: E le gore o ra ge ke babja ke eng mosatšana towe?

HUNADI: Sešane sa basadi! Ke sedupe mo nkago go kgona go bala tše lego mafahleng a gago?

MPHAKA: (O kgathola mahlong.) Na o bolela le nna bjang nke o ntirile motlabo wa gago?

HUNADI: (O sega lesego la kgegeo.) Uwe! Ge o le mo o tseba ge ke na le motlabo? Wa tla wa iphora ka lefeela ruri.

MPHAKA: Motho ga se naga ga a tsebje.

HUNADI: Ke sona se se go balabadišago ge o le fa monna tena?

MPHAKA: Tlogela go ngangalala. Lengwalo šele le tšwa go bomme, le bale o kwe gore le reng.

HUNADI: Ba reng?

MPHAKA: (O mo fa lengwalo.) Tšea o ipalele.

HUNADI: Kgane ga se wa le bala wena mo o sa kgonego go ntaodišetša dikagare tša lona?

MPHAKA: (O mo šušumetša ka lengwalo.) Ke re le bale o tla re ge o feditše ra boledišana ka lona.

HUNADI: (O tšea lengwalo a le phutholla mme a le bala.) Aowa, di a kwala. (O hlonama gannyane.) Mme ruri! O šetše a fo tlaišwa ke pelo le bogolo. Pelo e llela go bona ditlogolwana.

MPHAKA: Moo ke therešo mogatšaka. Re tla be ra mo romela sona seswantšho sela re se tšerego kgwedi ya go feta ge re be re etetše Bodikela.

HUNADI: Mohlomongwe moya wa gagwe o tla phuthologa ge a bona ditlogolwana a se sa re swara ka pelo. Ge motswadi wa gago a ka go itiela manxa gona ga go se se ka go lokelago lefaseng. Eupša ge o lokolotše pelo le moya, gona ditsela tša gago di tla