Bibel op Kölsch Neues Testament: Das ganze Neue Testament in kölnischer Sprache

Jakob Boch, Jahrgang 1928, wuchs am Krefelder Wall in Köln auf. Neben dem katholischen Milieu dieser Zeit prägten die Predigten des Kölner Jesuitenpaters Alois Schuh in den Siebiger Jahren sein Verständnis des christlichen Glaubens maßgeblich. Über zwei Jahrzehnte schrieb und dichtete Jakob Boch Texte für die jährliche „Kölsche Mess in der Bruder-Klaus-Siedlung. Nach dem Erfolg der Veröffentlichung der „Bibel op Kölsch mit ausgewählten Stücken der Heiligen Schrift im Jahr 2013 setzte er sich zum Ziel, das vollständige Neue Testament ins Kölsche zu übersetzen.

Die Mundart ist die Umgangssprache des Alltags; sie kommt aus dem unmittelbaren Erleben – man könnte sagen: von Herzen. Und wenn es ein kölsches Hätz ist, dann gilt: „Mer kann och ähnze Inhalte met Fruhsenn em Hätz betraachte."

Johanna Weich

Inhaltsverzeichnis

Vorwort

De Fruhbottschaff nom Matthäus

De Fruhbottschaff nom Markus

De Fruhbottschaff nom Lukas

De Fruhbottschaff nom Johannes

Apostelgeschichte

Bref an de Römer

Bref an de Korinther

Bref an de Korinther

Bref an de Jalater

Bref an de Epheser

Bref an de Philipper

Bref an de Kolosser

Bref an de Thessalonicher

Bref an de Thessalonicher

Bref an Timotheus

Bref an Timotheus

Bref an Titus

Bref an Philemon

Bref an de Hebräer

Bref an Jakobus

Bref vum Petrus

Bref vum Petrus

Bref vum .Johannes

Bref vum Johannes

Bref vum Johannes

Bref vum Judas

De Offebarung vum Johannes

Vorwort

1928 ben ich als letzter vun fünf Pänz om Krefelder Wall op de Welt jekumme. En der Agneskirch ben ich jedäuf wode un han 8 Johr de Schul Balthasarstroß ohne Setzeblieve üvverläv öm dann Modellschringer zu lihre. De Kreech han ich ohne Schade üvverstande un ben eesch Engk 1944 met der Firma evakoiert wode. Zo zwei Stefte op einem Rad simmer nom Engk vum Kreech en Kölle widder anjekumme, donoh ben ich widder zo mingem ale Betrieb jejange öm ming Jesellepröfung zo maache. Ich han met Schnapsbrenne, Hamstere, Klüttekläue, Handballspille un och en der Danzschull de Hungerzick mieh schläch als räsch üvverstande. En St. Agnes wor ich och widder Messdeener Mem Danze fing och et Posseere an, un su han ich 1953 jehierot. Ävver weil kein Wunnung zo krijje wor, han ich mich em Bau ömjesinn, öm met Bescheid zo wesse, wie mer baue muss. En der Broder Klaus Siedlung han ich dann jebaut. Et hät zwei Johr jedot, eh mer entrecke kunnte. En der Zick vör der Pill kome och fröh ming veer Pute op de Welt.

Knapp dressich Johr han ich dann en der Deutsche Welle jearbeit un ben zick 1991 Rentner. Johrelang simmer zum Pater Schuh en St. Peter en de Kirch jejange, die immer voll wor och vun Theologen. Selvs de Heinrich Böll kunnt mer do treffe. Pater Schuh kunnt de komplezeteeste theologische Sache esu prädije, dat och ich se verston kunnt. Als hä jestorve wor, han ich mer en neu Kirch jesook un ben en St. Alban beim Professor Herkenrath jelandet. Do dorf ich et eeschte mol en ner Mess op Kölsch metmaache. Die hat mer jot jefalle, un ich kunnt dä Pastur zo ner Mess en minger Pfarrei St. Bruder Klaus anmeere. Die es dann esu jot anjekumme, dat mer jedes Johr bei uns am Fastelovendsonndach en Mess op Kölsch feere. Och en Bettstund op Kölsch em Rahme vun iwije Jebett hammer anjebodde. Sick dä Zick han ich Bibeltexte nohverzallt un och op Melodie vun Fastelovendleeder neue Texte jeschrevve.

Ich kann kein Lating, Kreechisch ov Hebräisch un han die Texte no der deutsche Üvversetzunge nohverzallt. Drei Bibelüvversetzunge han ich jebruch, öm Inhalte besser zo kapeere. Ich ben vun e par Lück annemeet wode, ming Texte en nem Boch zo veröffentliche, wat dann minge Son jedon hät.

No dem eeschte Boch han ich vun vill Lück zo höre kräch, dat ich wiggermaache soll. Esu han ich mich dozo opjeraaf un han domet aanjefange, et komplette Neue Testament op Kölsch opzeschrieve. Domet hatt ich drei Johr kein Langewiel un en sennvoll Arbeid. Bal han ich och jemerk, dat et nit möjjelich es, et janze Neue Testament esu löstich noh zo verzälle, wie ich dat met dene usjewählte Stöckcher us em ahle Testament jemaat hat. Ich hoffe, dat ich et richtije Moß zwesche dem als däftich anjesinne Kölsch un der Fruhbottschaff jefunge han.

Dem Agnes Kratzeller möch ich he hätzlich danke, et hät sich de Möh jemaat und ne jroße Deil dorchjelesse un Fähler berichtigt.

Köln, am Christkönigsfest 2017 Jakob Boch

De Fruhbottschaff nom Matthäus

Mt 1,1-17 De Stammbaum vun Jesus

Vun Abraham bes David woren et veerzehn Jenerazijone. Vun David bes de Jüdde noh Babylon verschlepp woten woren et och veerzehn Jenerazijone, un vun Babylon bes Jesus woren et och widder veerzehn Jenerazijone. Donoh steit fas, dat dem Jupp, de Mann vun Maria, sing Ahne Abraham un David wore.

Mt 1,18-24 Jesus weed jebore

Maria, de Moder vun Jesus hat met singem Bräutijam noch nit zesamme jewonnt, do hät ihr Jott dorch singe Jeis e Kind jemaat. Als de Jupp dat jemerk hät, wollt hä sich hösch dorch de Koot maache. Em Draum hät im de Hellije Jeis jesaat, dat hä Maria zo sich nemme soll, weil dä Jung, dä et Maria kräch, vum Jott jewollt wör, un hä im de Name Jesus jevve soll. Jesus dät de Lück vun ihr Sünde erlöse. Dat alles es passet, dat de Wöder, die Jott üvver de Prophete hät sage loße: De Juffer kritt e Kind, dat Immanuel, Jott met uns heiße deit. De Jupp hät nit met Maria jeschlofe, e Jesus op de Welt jekumme wor.

Mt 1,18-24 Jesus weed jebore.

Dem Jupp sing Marie wor e fromm Weesch

Noch Juffer un schön wie e Gedeech

Dat wed de Moder vun Jesus hät Jott jesaat,

un hät ihr dorch de Hellije Jeis ihr e Kind jemaat

De Jupp jedaach, ich dun nit de Vatter söke

Ich maach mich dönn, un dummich verdröcke

Em Draum leet de Hellije Jeis in wesse,

dat es Joddes Werk, dun et Laufejon verjesse.

Hä soll dem Pütche de Name Jesus jevve

Als Joddes Son deit hä de Sünde verjevve.

Prophete han jeschrevve, wat passeet,

dä Jung es de Erlöser, de Här Jesus Chres.

Die Juffer Pütche hät dat jebore no Joddes Jeis,

Da Immanuel, Jott met uns, heiß

Mt 2,1-12 De Weise usem Oste

Als Jesus jebore wor, kome drei Weise, die Stäne deute kunnte, op ihre Kamele zum Künning Herodes no Jerusalem un wollte wesse, wo de neu jeborene Künning der Jüdde wör. Se hatte singe Stän jesin un welle im höldije. Herodes un sing janz Volk wore zo Dut verschreck. Se han alle schlaue Lück de Opdraach jejovve, nom Messias zo söke. Et wod im jesaat, dat beim Prophete steit: Do Bethlehem, em Land Juda, bes nit de Kleinste unger de Städte. Us der kütt einer, dä ding Volk föhre deit. Herodes hät denne Weise jesaat, dat se en Bethlehem söke solle, un wenn se dat Kind jefunge hätte, im Bescheid jevve solle, dat och hä dem Pütche höldije künnt. Se sin wigger jetrocke un dä Stän trok vör inne, bes hä met singem Stätz op ne Stall zeije dät. Se sin en de Stall eren jejange un soche dat Kind, Maria un de Jupp. Se han ne deefe Deener jemaat un inne ihr Präsentche , Jold, Weihrauch un Mirrhe jejovve. No koter Zick han se em Draum erfahre, dat se dem Herodes nit sage solle, wo de Messias es, un sin op nem andere Wäch heim jeredde.

Mt 2,1-12 De Weise usem Oste

Jesus wor jebore, un en der selve Stund,

maat ne neue Stän de drei Weise en Kund.

Ne Künningsson es jebore, es noch e Kind

Dot im höldije, sit esu flöck wie de Wind.

Die Drei han sich op ihr Kamele jesatz,

se wollte in söke, dä kleine Künningsfratz.

En Jerusalem, de Herodes fehl us alle Wolke

Ne neu e Künning jöv et, wat sage ich dem Volke.

Sing schlau Lück däte en de hellije Schreffte loore

en Bethlehem wöd dä kleine Künning jebore.

Dä Stän vör inne, üvver nem Stallmaat hä stopp,

un dodren loch dä klein Künningsstropp.

Jold, Weihrauch un Myrrhe han se metjebraat,

un dem Klein als Präsentche en de Krepp jelaat.

En nem Draum leet Jott se wesse,

dot heim rigge un de Herodes verjesse.

Mt 2,13-23 De Jungemord en Bethlehem

Als de Weise fott wore, hät ne Engel dem Jupp em Draum jesaat, dat hä sich met Maria un dem kleine Pütche no Äjypte op de Wäch mache soll, weil de fiese Herodes Jesus söke un dut maache well. Jupp es opjestande un es noch en dersälve Nach no Äjypte afjehaut un do jeblevve, bes Herodes jestorve wör. Esu es dat Woot vum Prophet wor jewode: Us Äjypte han ich minge Son jerofe. Weil de Weise dem Herodes nit jesaat han, wo dä Jung es, kom hä ärch em Rasch un hät en Bethlehem un en der janze Jäjend alle Junge bes zo zwei Johre dut maache loße. Esu es dem Jeremia sing Woot zor Wohr jewoode: Mer höt en Rama vill Knatsche un Jammere öm de Pute, die nit mieh do sin. Als de Herodes dut wor, hät ne Engel de Jupp wesse loße, dat hä met Maria un dem Jung no Israel zoröck jon soll. Weil hä Himmelangst vör Archelaos, dem Son vum Herodes, hat, sin se no Nazaret en Galiläa jejange. Esu es dem Prophet sing Wood wohr jewode, Jesus wed Nazoräer jenannt wäde.

Mt 3,1-12 Prädich vum Johannes, dem Däufer

Op ener Stroß, die nevven dem Jordan wor, trok vill Volk, de mihschte zo Foß oder op enem Esel, dorch de Jäjend. An ener Stell, wo der Jordan durch de Wüste flüss, wor der Johannes. Hä hät denne Lück, die vorbei kome, zojerofe: Driht üch eröm, höt op met dem fiese Levve, denn dr Himmel es noh". Der Prophet Jesaja hät de Lück schon vör langer Zick met dä Wöder weis jesaat: Dat es de Stemm, die us der Wüste röf. Maat de Wäch parat für de Här, dot alle Knubbele platt mache un stoppt de Löcher zo: Der Johannes hat sich e Wöbche us Kamelshoor met enem Reme öm der Buch jebunge. Et einzije, wat hä oß, wore Heuschrecke un welde Hunnich. De Minsche us Jerusalem un janz Judäa un dat janze Schmölzje, wat am Jordan wunne dät, kom zo im, hät jebich un leet sich däufe. Et kome och vill Pharisäer un Sadduzäer, die sich däufe loße wollte. Do saat hä zo denne: Ihr Jeffspritze un Schinghellije, meint ihr, ihr künnt laufe jon für dä Woot, die der Leeve Jott op üch hät? Ihr möt üch schon eröm drihe un nur dat dun, wat jot es. Un dot jo nit jläuve, dat, weil der Abraham öhre Vatter es, üch nix mieh passiere künnt. Ich sage üch: Us dä Stein, die he lijje, kann der Leeve Jott dem Abraham sing Pänz mache. Et steit allt einer do met nem Beil en der Hand, öm alle Bäum ömzohaue un en et För zo werfe, die kein jode Frooch brenge. Ich däufe nur met Wasser, domet ihr widder op de richtije Wäch kutt. Dä, dä no mir kütt, hät vill mih en de Maue als ich, un ich kann kein bessje an in tippe. Denn dä däuf met Hellije Jeis un met För. Hä deit alles uszorteere. Wä jet dauch, darf bei im blieve, un alles Andere wed en e För jeworfe, wat niemols us jeit.

Mt 3,13-17 Jesus wed jedäuf

Jesus es no Galiläa jejange, öm sich vun Johannes em Jordan Däufe zo loße. Dä wollt dat ävver nit dun, un saate: Woröm deiste zo mer kumme, ich han et nüdich, vun der jedäuf zo wäde. Jesus dät im antwoote: Dun mich däufe, weil et nüdich es för uns, alle Jerächtichkeite zo erfülle. Do hät Johannes in gedäuf. Als Jesus usem Wasser kom, jingk de Himmel op, un de Jeis Joddes kom wie en Dauv op in eraf, un mer hot en Stemm, die saate: Dat es minge leeve Jung, dä mer ärch jod jefällt.

Mt 4,1-11 Der Deuvel bei Jesus

En der Wüste hät Jesus veezich Dach jefaas, un singe Mage hät jeknottert wie ne Hungk. Der Deuvel wollt in verführe un saate: Wenn do Joddes Son bes, dann los doch us den decke Stein e Brut wäde. Hä kräch vun Jesus zo höre, dat jeschrivve steit, de Minsch deit nit vun Brut allein levve. De Minsch bruch och Wöder vun Jott. De Deuvel nohm in met en de hellije Stadt op de Zinne vum Tempel un saate: Wenn do Joddes Son bes, dann loß dich vun he bovve erunder fall, denn et steit jeschrevve: Jott hät singer Engele Avis jejovve, dat se dich op Häng drage solle, dat do nit jäje ne Stein stüsse dies. Jesus saate: Et steit ävver och jeschrevve, Do solls dinge Jott nit versöke. De Deuvel es met im op de hüchste Birch jefloge un hät im alles Jroße un Schöne op der Welt jezeich, un jesaat: Dat alles dun ich der jevve, wenn do dich vör mer op de Nas läje, un mich anbedde deis: Do saate Jesus: Jangk mer us de Auge do Satansbrode, denn et steit och jeschrevve, do solls dingem Jott höldije un im allein deene. Do hät sich der Deuvel usem Stöpp jemaat un et kome Engele öm im zo deene.

Mt 4,1-11 Der Deuvel bei Jesus

En der Wüste hät Jesus jefaas veezich Dach

Singe Mage dät knurre knottere , maat richtich Krach.

Dodrop hat de Düvel alt lang jewat

Un hät dann zo Jesus janz kess jesaat:

Wenn do de Son bes vum jroße Jott

dann maach der us dem Stein e lecker Brut.

Jesus saat dem Düvel: „Et steit jeschrevve,

de Minsch deit nit nur vum Brutesse levve.

De Minsch bruch och Wöder vun Jott.

Do droch in de Düvel us de Wüste no Sion fott.

Wenn do vum Dach fälls, bliefs do am Levve"

Saat de Düvel: Et steit jo jeschrevve;

Engel drage dich op de Häng op dinger Reis

Dat do dich an keinem Stein stüsse deis.

Et steit ävver och jeschrevve, es e Jebot

do solls nit versöke dinge jode Jott.

Op de hüchste Birch hät de Düvel Jesus jebraat

Un mem jroße Ihrewoot zo Jesus jesaat:

Läch dich hin, dun mich anbedde, ich sage der,

alles wat do he süß, kres do dann vun mer.

Do saaten Jesus: Us minger Auge do Satansbrode,

wat jeschrevve steit well ich der verrode.

Nor vör dingem Jott solls do dich kneene,

un keine andere anbedde un deene".

Vun Jesus hät sich de Düvel flöck verdröck.

Jott scheckte Jesus Engele als sing Deenslück.

Mt 4,13 -23 De eeschte veer Jünger

Als mer Jesus jesaat hat, dat se de Johannes verhaftet han, es hä no Galiläa jejange un hät sich am See e Zemmer jesook. Su es et wor jewode, wat Isaias jesaat hät: Et Land am See, op de andere Sick vum Jordan, et Land der Heide, Galiläa, dat Volk, dat em Düstere setz, soch e Jroß Leech, un denne, die em Land un em Schatte vum Dut setze, es e Leech üvver inne opjejange. Sick dä Zick hät Jesus jeprädich: Dot üch bekerre, weil e Rich vum Himmel en der Nöh es: Als Jesus am Galiläischen See vorbei jingk, wore do zwei Bröder, Simon, jenannt Petrus ub Andreas. Die wore Fescher un han et Netz usjeworfe. Jesus saate zo inne: Kutt, un jod met mer. Ich maache üch zo Fescher, die Minsche fange. Die Zwei han alles ston un lijje jeloße un sin met im jejange. Als se wiggerjingke, woren do widder zwei Bröder, Jakobus un Johannes, die met ihrem Vatter Zebedäus, em Boot soße un de Netze am flecke wore. Och die hät Jesus jerofe. Se han Vatter un Boot do jeloße un sin met im jejange. Se sin dorch Galiläa jetrocke. Se han en de Synagoge de Fruhbottschaf verkündet un Kranke jesund jemaat. Dat hät sich en janz Syrien erömjesproche, un se braten Minsche, die vun alle müjjeliche Krankheite jeploch wode. Se han se allemole jesund jemaat; och Mondsüchtije un Besessene. Janz vill Lück us Galiläa, Jerusalem, Judäa un vun der schäl Sick vum Jordan sin met inne jetrocke.

Mt 5,3-12 Birchprädich

Als Jesus dat ville Volk soch, wat met im trok, hät hä sich op enem Birch hinjesatz un für sing Fründe un dat Volk jesaat: "

Sillich, die jeck sin un nix em Jeheens han,

denne jehöt der Himmel.

Sillich, die trore,

die wäde Trus erfahre.

Sillich, die e weich Jemöt han un nit tirek usem Anzoch sprenge,

die wäde dat Land ihr Eije nenne Sillich, die Schmach han no Jerächtichkeit, die wäde satt wäde.

Sillich, die e weich Hätz han, un de Nut vun de Andere sin un versöke zo helfe,

die wäde em Himmel met weichem Hätz opjenomme.

Sillich, die e rein Hätz un nit der Deufel en der Siel , die wäde Jott sinn.

Sillich, die sich üvverall öm Fridde bemöhe,

die wäde Sön un Döchter Joddes heiße.

Sillich, die verfolch un jepiesack wäde, weil se für Jerächtichkeit kämpfe,

denne jehöt der Himmel.

Sillich sid ihr, wenn se üch wäje mir verfolje un quäle, un nur Schlächtes nohsage,

freut üch do drüvver, ühre Luhn em Himmel es janz jroß.

Denn dat han se och met de Prophete jemaat.

Sillich, die sich afrackere, öm Andere en Freud zo mache, die wäde lachend am Himmelspötzje empfange.

Mt 5,13-19 Salz en Zupp

Ehr sid för de Minsche et Salz. Wenn ävver et Salz laff jewoode es, womet soll mer et dann widder salze. Et dauch nix mih, et es för nix mieh zo jebruche. mer kann et nur noch op de Kipp brenge. Ihr sind för de Minsche et Leech. En Stadt, die bovve huh om Berg litt, kann sujar dä sinn, dä Knöpp op de Auge hät. Och stich mer kein Käz an un spölp e Döppe do drüvver. Nä, wenn mer e Leech anjestoche hät, stellt mer et huh op ene Leuchter, domet et för alle Lücken der Stuff hell wed. Su sollt ehr wie e Leech leuchte vör de Minsche. Dann sinn se, wat ehr Jodes doot. Se singe dann us Freud dem Vatter em Himmel e Lovleed. Dot jonit jläuve, dat ich jekumme ben, öm jäje dat zo sin, wat de Prophete jesaat han un dun de Jesetze oplüse. Nä, ich dun alles erfülle. Ich sage üch: Himmel un Äd jon nit eher unger, e et Jesetz nit bes op et kleinste Fitzje erfüllt es. Wä Jebotte usradeere well, es em Himmel de Kleinste, wä donoh levve deit es jroß em Himmel.

Mt 5,20-48 E besser Hätz

Jesus saate: Wenn ihr nit jerächter sit als de Schreffjelehte un de Pharisäer, künnt ihr nit en de Himmel kumme. Zo de Ahle es jesaat wode, do solls kein dut maache. Ävver ich sage üch, dat jede, dä Andere met fiese Wöder usschänge deit, soll der Düvel holle.Wenn do jet nom Altar bringe wells, un et fällt der en, dat einer jet jäje dich hät, dann loss ding Jave vörm Altar lijje un jangk zo dingem Broder un dun dich widder met im verdrage. Do no kannste die Offer op de Altar läje. Sorch flöck för ne Usjlich met dingem Feind, domet dä dich nit vör de Reechter schlepp un do en de Pötz küss, bes dat do alles berapp häs.Et wood och jesaat, do solls nit, wenn de verhierod bes, fremb jon. Ich sage üch, allemole, die Andere bejerre, han em Hätz de Ehe jebroche. Dun dat usrieße un weg werfe, wat dich zo ner Sünd verführe well, ejal op Auch, Ärm of Bein. Wä sing besser Ehehälfte fottscheck un sich jet Neues söke deit, deit de Ehe breche. Dun nie schwöre; sach entweder jo oder näh. Auch jäje Auch, un Zänk jäje Zänk deit keine Fridde bringe. Wenn der einer en Knallzijar op de rechte Backe jit, dann dun im och de linke anbeede. Un wenn der einer et Kamesol avnemme well, jev im och noch de Mantel. Et wood jesaat, dat mer singe Fründ jän un singe Feind hasse soll. Ich sage üch: Hat ühr Feind jän, un dot för die, die üch jet Fieses welle, bedde. Dann sit ihr Sön vum Vatter im Himmel, denn dä jit Sonnesching un Rähn alle Minsche, op se jod of schläch sin. Wenn ihr nor zo ühr Bröder fründlich sit, wat es schon dobei, denn dat dun och de Heide. Dot probeere perfek zo sin, wie ühre Vatter em Himmel".

Mt 6,1-6 Met Almose un Bedde anjevve

Dot jod oppasse, dat ühr Jerächtichkeit nit an de jroße Jlock jehange wed, weil dovun Jott nix wesse well. De Heuchler, die em Tempel un op der Stroß nor spende un bedde wenn se jesinn wäde, die krijje em Himmel wat se bruche. Wenn do Almose jevve deis, dann soll ding rächte Hand nit wesse, wat de linke deit. Un wenn do bedde deis, dann mach et nit wie die Sülehellije, die vun alle Lück jesinn wäde wolle. Jangk en ding Zemmer un dun do bedde, den Jott kann alles, wat verstoche es sin.

Mt 6,7-15 Et Vatter unser

Dot nit schwade wie de Heide, die meine, dat se jehoot wöde. De Vatter em Himmel weiß. eh ihr de Muhl opjemaat hat, wat ihr bruche dot. So sollt ihr bedde.

Leeve Jott, do bes uns alles, Vatter un Moder, ding Riech es esu jroß, dat mer allemole do eren kumme künne. Alles, wat do wells, soll passere, bei der em Himmel un he op der Äd. Do jiss, wat mer Minsche zum Levve bruche, och wemmer schläch deile künne. Do bes jnädich un deis Schold verjevve. Helf och uns, Andere zo verjevve, wenn se uns op de Föß jetrodde han. Halt alles Fiese vun uns fän, dat mer de Wäch zo der finge. Mer röhme un ihre dich, denn der allein es alles, hück, un en Iwichkeit.

Mt 6,19-24 De wohre Schatz

Doot kein Schätz zosamme raafe un bei üch stapele, weil se vun Motte un Würm kapott oder vun de Spetzbove jeklaut wäde. Sammelt üch besser Schätze em Himmel, weil et do kein Würm, Motte un Halunke jit. Ehr sit emmer met ührem Hätz do, wo och ühr Leevstes es. Keiner kann Deener vun zwei Häre sin. Dem eine mät hä Kratzfößje un dä andere dät hä am leevste verjefte. Dat heiß: Do kanns entweder dingem Jott deene oder die janz Senne drieht sich nor öm de Jrosche

Mt 6,25-34 Dot an de Vörsinn jläuve

Maat üch kein Sorje üvver dat, wat ühr esse un antrecke dot. Es nit et Levve mieh wie esse, un de Liev mieh als de Plute? De Vüjjelche siee, ernte un sammele nit, ävver de Vatter im Himmel deit för se sorje. Ihr sit doch vill mieh als die. Do kanns dich met Sorje keine Dach älder maache. Lur der de Blome an, wie se waaße, se arbeide, spenne un nihe nit, ävver Salomon met all singer Prach wor ne Lumpemann jäje se. Wenn Jott sorje deit för alles Jröns, dat hück jewaaße un morje verdrüch es, wievill mieh sorch hä för üch Kleinjläuvije. Dot üch nit üvver et Morje de Kopp zerbreche. De Vatter im Himmel weiß, wat ihr nüdich hat. Dot et Reich Joddes söke un de Jerächtichkeit.

Mt 7,1-12 Dot nit reechte

Dot nit reechte un ordeile, weil esu, wie ihr et dot, wed et och met üch jemaat. Sök nit nom Splitter em Auch vun dingem Broder, wenn do nit de Balke en dingem eijene Auch sühs. Dot et Hellije nit de Hüng jevve un dot Perle nit vör de Säu schmieße. Se tredde op dat, wat do inne jejovve häs, un falle dann üvver dich her. Wenn ihr öm jet bedde dot, wed üch dat jejovve, un wenn ihr söke dot, fingkt ihr et och. De Dör wed üch opjemaat, wenn ihr ankloppe dot. Jevvt ihr ührem Son ne Stein statt Brut, wenn dä Schmach hät? Un dot ihr dem en Schlang jevve, wenn hä ne Fesch han well? Ihr sit all kein Engele un dot ühre Pute nur Jodes jevve. Vill mieh als ihr jit üch ühre Vatter em Himmel, wenn ihr in öm jet bedde dot. All dat, wat mer üch Jodes deit, dat sollt ihr och Andere dun.

Mt 7,12-28 Falsche Prophete un jod Fründe

Jangk dorch de et kleine Pötzje, och wenn de Wäch schmal es, weil de jlatte un breide Wäch, den vill jelaufe sin, en et Verderve führt. Losst üch nit vun falsche Prophete Hunnich öm de Muhl schmiere, weil se enne Minschefresser sin. An dem, wat se dun un schwade, kannste sinn, wat met inne los es. Jod Obst deit mer vun nem jode Baum plöcke, Us nem Baum met fiese Froch mäht mer nor Brandholz. Wä dat deit, wat minge Vatter well, un nit dä, dä Här Här zo mer sät, kann en de Himmel kumme. Die jage ich fot, die zo mer sage, wat se alles Jode en mingem Name jedon han. Jeder, dä sich an dat hält, wat ich sage, es wie einer, dä sing Huus op faste Boddem baut. Dat steit fas bei Sturm un Rähn wie en Mor. Einer, dä nit deit, wat ich sage, es jet wie ne Jeck, weil sing Huus, wat en de Sand jesetz es, beim nöchste Donnerwedder ömfällt. Als Jesus opjehot hat, brummte de Lück de Kopp, weil hä verzallt hat wie einer, dä de Maach hat, un nit wie ne Schreffjelehte.

Mt 8,1-13 Wunder, Ussätzije un ne Knäch

Vill Lück leefe Jesus hingerher. Do kom einer, dä Aussatz hat, un saate zo Jesus: Herr, wenn do wells, es ming Huck widder rein. Jesus hät im en Hand op de Scholder jelaat, un saate: Ich well, dat do rein bes. Un em Nu hat hä en Huck wie e Kinderföttche. Wigger saate Jesus: Sach keinem, wat he passet es. Jangk, dun dich de Priester zeije, un breng e Offer dar, wie et Moses jesaat hät: Se sin wigger jejange un kome no Kapharnaum, wo ne Hauptmann zo Jesus un saate: Herr, minge Knäch litt zo Huus, es dudkrank un hät ärje Ping. Jesus frochten in, op hä kumme un in jesund maache soll. Do saaten dä Hauptmann: Herr ich ben et nit Wät, dat do en mieh Huus küss. Ävver do bruchs nor ein Wötche zo sage, dann es dä Knäch widder jesund. Och ich ben einer, dä Avis jevve kann, un wenn ich jet befelle, dann müsse de Saldate hüre. Jesus wor vun de Söck un saate: Em janze Land han ich noch keine jetroffe, dä esu eine Jläuve hät. Jangk Heim, wat do jejläuv häs, passet. Un em jliche Momang wor dä Knäch jesund.

Mt 8,18-34 Nochfolje, Storm, Besessene un Säu

Ne Schrefjelehte saate zo Jesus: Meister, ich well met der jon, ejal wohin do hinjeis. Un Jesus dät im sage: De Müs verkruffe sich en ihr Loch, de Vüjjelche schlofe en ihrem Nest. Nor ich wunne nirjendwo un han kein Bett, wo ich schlofe kann. Ne Jünger wollt ech singe Vatter bejrave, un Jesus saate: Loss de Dude bei de Dude, do ävver jangk met mer. Jesus soß met singer Fründe en nem Boot un fuhr üvver ne See. Do kom ne Storm op, un se hatte Angs, dat se versuffe däte. Se han Jesus jeweck, un dä saate: Wat sit ihr doch Botzendresser, ihr Kleinjläuvije. Dann es hä opjestande un hät de Storm un de See usjeschant, un em Nu wor et Mucksmüsjestell. De Lück frochten sich, wä dat wör, op den Wind un Wasser hüre. Als se widder an Land wore, komen zwei Besessene, vör denne alle Lück Bammel hatte un han jebrüllt: Wat hammer jedon, Son Joddes? Bes do jekumme, öm uns zo pisacke? Nevvenan wor en Herde Säu, un die Dämone wollte, wenn Jesus se verjage dät, en die Säu fahre. Un Jesus saate: Fott met üch! Die Dämone fuhre en die Säu, die da Afhang erunder raste, öm unge enem See zo versuffe. Die Lück, denne die Diere jehote, han zo Jesus jesaat, dat hä fot jon soll us der Jäjend.

Mt 9,1-9 Heilung vun nem Lahme

Se Komen met nem Lahme op ner no Bahre zo Jesus. Als dä se soch, saate Hä: Han kein Angs, ding Sünde sin der verjovve. E par Schrefjelehte hoten dat un meinten, dat hä Jott lästere dät. Jesus kunnt ihr Jedanke lese un saate: Woröm hat ihr schlächte Jedanke? Wat es leichter zo sage: ding Sünde sin der verjovve of stank op un jangk heim. Domet Ihr ävver merke dot, wat de Minscheson kann, sage ich:Stank op!. Un hä stund op un jingk heim. De Lück, die dat jesinn han, han Bauklötz jestaunt üvver ne Minsch, dem Jott suvill Maach jejovve hät.

Mt 9,10-26 Esse met Sünder, Faaste, Bloterin

Als Jesus un sing Fründe am Desch wore un esse däte, komen Sündije un Zöllner an singe Desch. Woröm deit ühre Meister met su en Type esse? frochten Pharisäer die Junge. Jesus hoten dat, un saate: De Kranke bruche ne Doktor, nit de Jesunde. Ihr möt lihre, wat Erbarme heiß. Ich rofe kein Jerächte, Sünder bruche mich. De Johannesjünger frochten Jesus: Woröm dummer faste, ävver ding Fründe nit? Jesus saate: En Huhzick es kein Troorspill, un et wed jemüffelt, sulang de Bräutijam bei inne es. Wenn dä nit mieh do es, wed jefaas. Junge Wing zerrieße al Schläuch, wemmer in do eren deit, un es verdorve. Nä mer füllt in en neu Schläuch. Do kom ne Brodermeister eren un fehl für Jesus op de Kneen, un saate: Ming Dochter es jrad jestorve, kumm un dun ding Häng op se läje, domet se widder levve deit. Jesus un sing Fründe sin met im jejange, un en Frau, die Bloterin wor, hät in hösch an singe Punjel beröhrt, weil se dach, wenn ich in berühre, ben ich widder jesund. Jesus hät dat ävver jemerk, un saate zo ihr: Do häss vill Kurasch, ävver dinge Glaube hät der jeholfe, un se wor widder jesund. Als se zo dem Huus vun dem Brodermeister kome, wor et Troorspill vun de Lück un Fleutespiller schon dran. Weil Jesus zo inne saate, se sollen stell sin, weil dat Mädche nor schlofe dät, han se in usjelaach. Hä es zo im jejange, hät im de Häng opjelat, un dat Mädche es opjestande. Üvver dat Wunder wod en der janze Jäjend jeschwad.

Mt 9,27-37 Zwei Blinde, ne Stumme

Zwei Blinde sin Jesus nojelaufe un han jebrüllt: Erbärm dich unser, do Son vum David. Jesus hät se jefroch, ob se jläuve däte, dat hä dat künnt. Als se: Jo! saate, hät hä inne op de Auge jeföhlt un jesaat: Wenn ihr dat jläuve dot, dann soll dat och passeere. Als se widder sinn kunnte, hät hä inne verbodde, einem dovun jet zo sage; ävver ihr Freud wor esu jroß, dat se alle Lück dovun verzallt han. Och ne Stumme hät hä widder schwade loße. Alles hät sich jewundert üvver dat, wat hä alles heile kunnt. Nor de Pharisäer saate, dat Jesus da Dämone mem Deufel usdrieve dät. Jesus es dorch et Land jetrocke, hät jeprädich un Kranke jesund jemaat un wor am Engk hungksmöd. Hä saate zo singe Fründe: Et jitt zo winnich Arbeider, un et es vill zo ernte. Dot zo Jott bedde, dat hä Helfer schecke deit.

Mt 10,1-16. Die Jünger wäde losjescheck

Jesus hät sing zwölf Jünger losjescheck, öm Wunder zo werke. Dat wore: Simon-Petrus un singe Broder Andreas, Jakobus un singe Broder Johannes, Philippus un Bartholomäus, Thomas un Mathäus, Jakobus un Alphäus, Simon un Judas Iskariot. Jesus saate inne: Jod nit zo de Heide un och nit bei de Samariter. Dot en Israel blieve, un sat de Lück, dat de Himmel en de Nöh wör. Dot alles dat, wat ich jemaat han. Maat Kranke jesund, Dude labendich, Leprakranke rein un dot Dämone fott jage. Dot kein Esse un Drinke, kein Jeld un kein zweite Plute un Schohn metnemme, weil jede Arbeit ihre Luhn wät es. Dot fründlich jröße, wenn ihr en e Huus eren jod, un wenn se üch fründlich opnemme, dann soll ühre Fridde op et kumme. Wenn se üch ävver nit wolle, so dot dat Huus oder dat Dorf verjesse. Et kütt Schlemmes üvver die, die üch nit han wollte. Ich schecke üch wie Schofe unger e Rudel Wölf. Jod met reinem Hätze un schlau wie en Schlang üvver Land.

Mt 10,17-25 Wäje mer wed ihr verfolch

De Minsche wäde üch verfolje, vör de Reechter schleppe un en der Synagog kamesöle. Maat üch kein Jedanke üvver dat, wat ihr schwade dot, wenn se üch vör de Jereechte schleppe. Jott lät üch en de Muul, wat ihr sage dot. Einer wed dem Andere singe Deufel sin. Jeder jäje Jede. Väter jäje ihr Pute un Bröder, Pute jäje de Ahle un Jeschwister. Weil ihr zo mer halde dot, dun se üch hasse. Ävver wenn ihr bes an et Engk mer treu blieve dot, wed Ihr jerettet. Ne Jesell es nit mieh als de Baas, un de Knäch nit mieh als de Här. Wenn de Huushär de Düvel es, wat sin dann sing Kumpane?

Mt 10,26-42 Dot schwade, ohne Kadangks

Maat üch kein Sorje vör dem Pack, weil et nix Jeheime jit, wat nit erus kütt. Hat keine Bammel vör denne, die üch dut schlage welle, ühr Siel künne se nit kapot maache. Wenn och ne Spatz nor e par Penning koste deit, et fällt keine einzije vun inne vum Himmel, ohne dat et Jott well. Jott weiß sujar, wievill Hoore do om Kopp häs. Ich ston zo dem bei mingem Vatter, dä och för alle Minsche zo mer steit. Ich ben nit jekumme öm Fridde zo bringe, ich han de Säbel bei mer. Ich ben et Schold, weil Minsche die zo mer ston, sich met alle denne, die anders denke, verkrache. Wä sing Eldere un Jeschwistere leever hät als mich, un wä sing Krütz nit op sing Scholder nimmp, un met mer jeit, es et nit wät, minge Fründ zo sin. Wä üch opnemme deit, nimmp och mich op un den, dä mich jescheck hät.

Mt 11,1-19 Jesus sät vun Johannes

Als Jesus met singer Fründe dorch de Jäjend jetrocke es un üvverall jeprädich hat, wollt Johannes, dä en de Blech soß, wesse, op Jesus dä wör, op dä se wade däte, oder op noch ne Andere köm. Jesus saate: Jod zo Johannes un sat im, wat ihr sinn un hüre künnt. Blinde künne widder sinn, Lahme laufe, Dauve hüre, Ussätzije wäde rein, Dude widder labendich un dem ärme Volk wed de Fruhbottschaff jeprädich. Un Jesus hät wigger jesproche üvver Johannes. Woröm sid ihr en de Wüste jekumme? Wollt ihr ne Minsch sin en Fraulückskleider? Bei Fürste un Künnije wäde su en Klamotte jedrage. Hä es mieh als ne Prophet, denn vun im steit jeschrevve, dat Jott ne Bodde vör der her, öm der de Wäch jlatt zo maache. Keiner es jrößer als Johannes der Däufer. De Minsche saaten vun im, dat ne Dämon en ihm wör, weil hä en der Wüste nix jejesse un jedrunke hät. Als de Minscheson kom, saaten se, dat dä ne Fressklötsch un ne Suffbroder wör, weil hä sich met Sünder un Zöllner an eine Desch setze dät".

Mt 11,20-30 Drohe un Jubele

Weil de Minsche, do, wo Jesus jeprädich hat, nit op dat jehoot han, wat hä jesaat hät, hät hä inne Schlemmes anjedraut. Denn met üch wed et vill schlemmer jon, als met Sodom passet es. Un Jesus hät jebett: Ich priese dich leeve Vatter. Do häs Himmel un Äd jemaat, do deis ding Maach nit de Schlaue, sondern de klein Lück zeije. Alles hät mer minge Vatter jejovve. Keiner kennt Joddes Son, un keiner kennt de Vatter usser dem Son. un denne, die an in jläuve. Kutt allemole bei mich, die am Levve schwer zo drage han, ich well üch Freud schenke. Dot vun mer lihre. Ich han e jod Hätz, un ihr dot ühr Rauh finge. Ming Joch es sanef un ming Lass es janz leich.

Mt 12,1-14 Frooch un en schlemm Hand

An nem Sabbat jingk Jesus un sing Jünger dorch e Koonfeld, un weil se Schmach hatte, han se Köner avjerupp un jejesse. De Pharisäer soche dat un saaten zo ihm: Ding Fründe dun jet, wat am Sabbat verbodde es. Jesus saaten inne: Hat ihr nit jelese, wie David un sing Lück Kohldampf hatte un em Tempel de hellije Brude jejesse han, die nor de Priester esse dörfe. Dun die sündije, wenn se am Sabbat em Tempel arbeide, wat för jede andere en Sünd es? Ich sage üch, he es mieh als de Tempel. Weil ihr nit wesse dot, wat Erbärmde es, dot ihr Unschöldije verorteile. De Minscheson es mieh als de Sabbat. Donoh sin se wiggerjejange un trofe ne Mann, dä en janz schlemm Hand hat, met dä hä nix dun kunnt. Es et verbodde?, frochten Jesus de Pharisäer, un dot ihr mich anklage, wenn ich am Sabbat ne Kranke jesund mache? Un hä saate wigger: Wenn einem vun üch sing einzich Schof am Sabbat en e Loch fällt, deit hä et do erus nemme? Es de Minsch nit vill mieh als e Schof? No saat mer jet. Dann saate hä zo dem Mann: Streck ding Hand us! Un se wor jesund jewode. Die Pharisäer sin erusjejange un han üvverlat, wie se in an de Jalje bringe künnte.

Mt 12,15-32 Jesus, Joddes Knech, Beelzebul

Jesus hät dat jemerk un hät sich verdrück. Et sin im vill Kranke nohjekumme, un hä hät se allemole jesund jemaat. Se sollten ävver keinem jet dovun verzälle. Dat es passet, domet wor wed, wie et jeschrevve steit: ehr künnt minge Knäch sinn, dä mer jod jefällt. Ich läje minge Jeis en in, un hä wed Räch verkünde. Hä mät keine jroße Ophehevvens öm dat, wat hä sät. Hä deit keinem jet, bes et Räch jewonne hät. Alle Völker setze op singe Name ihr Hoffe. Et kome Lück, die ne Besessene braten, dä stumm un blind wor. Jesus hat in jesund jemaat un de Lück han Bauklötz jestaunt un frochten sich, op dat de Son Davids wör. Die Pharisäer, die dat hoten saaten: Dä driev de Dämone met Beelzebul us. Jesus kunnt op ihrer Steen lese, wat se dachten, un saate: Kein Land, wat usenein fällt, kann jenau su winnich bestonn wie e Huus, wat mer deile will. Wenn der Satan de Düvel verjage well, dann mät hä sing Maach kapott. Wenn ich de Dämone mem Jeis Joddes usdrieve, dann kütt zo üch Joddes Heil. Keiner vun üch kann e Huus üvverfalle un plündere, wenn hä sich nit vörher schlau jemaat hät, wie stärk de Andere es. Wä nit met mer es, es jäje mich un zerstreut, anstatt met mer zo sammele. Wenn ihr Schlächtes üvver mich schwade dot, wed üch verjevve, wä ävver Schlächtes üvver de hellije Jeis sät, för den jit et kein Verjevve.

Mt 12,33-50 Hätz un Wöder, de wohre Verwandte

Jesus sate: Wenn ne Baum jod es, dann es och sing Frooch jod; un wenn ne Baum schläch es, dät auch och sing Frooch nix dauge. An de Frooch süht mer, wat met dem Baum loss es. Wie kann dat Rattepack Jodes schwade, wenn et en schwatze Siel hät? Wo et Hätz vun voll es, dovun läuf de Muul üvver. Ich sage üch: Jedes unnötze Woot wat ihr schwade dot, kritt ihr beim Jereech unger na Nas jehalde. E paar Schreffjelehte wollte e Zeiche vun im sinn, un se krächten zo hüre, dat e fies un sündich Volk kein Zeiche vun im kräch. Jona wor drei Dach em Buch vun nem Fesch, un de Minscheson wed nor drei Dach dut em Jrav lijje. De Lück en Nineve han op Jona jehot un nit mieh jesündich. Jesus wor zo de Lück am spreche, un einer saate zo im: Drusse steit ding Moder met dinger Bröder, un se wolle, dat do erus kumme deis, öm met inne zo schwade. Jesus saaten: Wä es ming Moder un wä sin ming Bröder? Jeder dä dat deit, wat minge Vatter em Himmel well, es mer Broder, Schwester un Moder.

Mt13,1-43 Unkruck, Mostert un Surdeich

Zo janz vill Lück, die bei im wore, saate Jesus: Mem Himmel es et wie met nem Boor, dä jode Same op singe Acker jestreut hät. Nachts kom Kradepack un hät Unkruck üvver et Feld verstreut. Als de Weize kieme dät, kom och et Unkruck us de Äd jeschosse. De Knechte meinte, dat de Boor doch jode Same jestreut hät, un kunnte nit verston, wieso do esu vill Unkruck waaße dät. Dä Boor saate hä: Dat hät minge Feind jedon . Die Knächte frochten in, op se dat Unkruck usrieße solle, un krächten zo hüre, dat se dobei och de Froch kapott tredde däte. Lommer et waaße loße un beim ernte solle de Lück met der Sens esch et Unkruck püngele un verbrenne, de Weize ävver en ming Schür bringe. Wigger saate Jesus: Et Riech em Himmel es wie e Könche vum Mostert, dat einer op singem Acker en de Äd deit. Et es et kleinste vun alle Someköncher, wenn et ävver waaße deit, es et am Engk et jrößte vun allem, wat em Jade waaße deit. Wemmer e Knübbelche Surdeich en en Bütt Deich deit, dann dot et nit Lang, bes alles sur es. Als die Lück fott wore, saate Jesus zo sing Fründe: Dä, dä jode Same jesiet hät, es de Minscheson un de Acker es de Welt. De jode Same sin de Kinder Joddes, un et Unkruck sin dem Schlächte sin Pute. De Erntezick es et Engk der Welt un de Lück met de Sens sin de Engele. Wie et Unkruck en et Für jeworfe wed, su wed dat janze Kradepack en de Höll jestopp, un do krijjen se, wat se bruche. De Jerächte kumme en et Rich vum Vatter em Himmel".

Mt13,44-51 De Schatz em Acker

Jesus sate: De Himmel es wie ne Acker, en dem ne Schatz es, vun dem keiner jet weiß. Als en einer zofällich jefunge hat, hät hä in widder verstoche. Hä hät alles wat hä hat, verklopp un hät dat Feld jekauf, öm domet och de Schatz zo han. Och es de Himmel jet wie Kaufmann, dä schöne Päle söke deit. Op einmol hat hä ävver de schönste Päl jesinn, die et jov. Hä hät all sing Päle verklopp, öm die eine zo han. Wie e Netz, en dem mer vill Fesch jefange hät, es de Himmel. Die jode Fesch kumme en e Döppe un die Schlächte wirf mer fot. Su es et am Engk op der Welt. De Engele dun de schlächte Minsche ussöke un en de Höll verdamme. Hat ihr mich verstande? Doröm es ne Schrefjelehte, dä dorch de Schul vum Himmel jingk, jet wie ne Vatter, dä us singem Schatz Neues un Aales erushölt.

Mt 13,53-58 Jesus deit Nazaret besöke

Als Jesus fädich wor met de Jleichnisse, es hä en sing Heimat, no Nazaret jejange. Do hät hä em Tempel jeprädich, un de Lück han jestaunt, wie schlau hä wör, un üvver die Wunder, die hä werke dät. Se meinten, dat dat de Son vum Zimmermanns Jupp wör un sing Moder Maria un sing Bröder Köbes, Jupp, Simon un Judas wöre. Och sing Schwestere däte allemole bei inne wunne. Weil se nit verston kunnte, woher hä dat hat, woren se neidisch un wollte nix mieh vun im wesse. Jesus saate inne: „Keine Prophet kann en singer Heimat un en singem Huus ne Blomepott jewenne. Lück, die sing Famillich kenne, dun in veraachte". Jesus hät do nix mieh jedon un es fottjejange.

Mt 14,1-12 De Dut vun Johannes dem Däufer

Dem Föösch Herodes han se üvver Jesus jesaat, dat Jesus Johannes der Däufer wör. Dä wör widder labendich jewode un dät Wunder werke. Herodes hat in nämlich en de Pötz jestopp, weil Johannes im jesaat hat, dat et falsch wör, Herodias, de Frau vun singem Broder Philippus zo hierode. Hä