Ntshwê

Pilusa o be a ipoditše gore a ka se tsoge a kopane le mosadi wa ditoro tša gagwe. Ka go kwa gore gaNtsoko go na le mokete wa lenyalo a ya e le ge a tšhaba polelo ya mogologolo ya gore lesogana le sa etego le tšea kgaetšedi. O be a sa kgone go ka ithekga ka la gore thoka ya kgole ga e bolaye mmutla. Pilusa o kopane le basadi ba bantši peleng, babotse le babobe fela gago le o tee yoo a kilego a mo goga maikutlo. O ba bone basetsana ba motse wa gabo wa Lekhureng gomme ga go le yoo a kilego a kganyoga go mo nyala.

Bjale lehono o ka re o mo humane. Batho e be e le mabu le matlakala moo moletlong. Pilusa o ile a mmona ka gare ga batho ba bantši. E be e ka ba kgarebe ya nywaga ye masomepedi, yo motelele. Go mo lebelela fela a bona e ke masa a sele. A re kganthe o bona mphatlalatšane naledi ya masa. Aowa, o be a bona kgarebe ya nko ya lenono.

Mosetsana yoo o be a apere mosese wo motelele wa go fihla dikgokgoilaneng. Moriri wa gagwe a se a o tlotša ka dihlare tša makgowa. Go mmona fela Pilusa a tseba gore ke yena ngwetši ya Bakone. O be a nyaka go mo apiša efela a kwa a bethwa ke letswalo. A ipitša setlaela le maina a mabe ao a ilego a a nagana. Ka nakonyana o be a tlelwa ke maatla a go ka ntšha sa mafahleng a gagwe. Nako ye nngwe a tlelwe ke letšhogo, a se tsebe gore a thome kae.

A ipotša gore ge a ka apiša kgarebe yeo gomme ya gana, a ka se lahlegelwe ke selo ge e se boitshepo fela. A beta sebete morwa Kgabalatsane gomme a dula kgauswi ga kgarebe. A hlagiša sa mafahleng a gagwe gomme a amogelwa. Ge a fihla gae bošegong bjoo a bula Bibele ya gagwe. A bala Petro wa pele tema ya boraro le Bakuranta ba pele tema ya bošupa temana ya pele. A bona gore lehono gona o kopane le mosadi wa ditoro tša gagwe. Mosadi yo a kago dumela go bušwa ke monna wa gagwe. O be a bona ge a se na botšhepi bja ntle le bja go loga moriri le go apara tša gauta le bothakga bja mašela. Le kgwadi ya boJesu e a mo hlatsela. Ke yena mosadi wa ditoro tša gagwe.

Ka morago ga kgwedi tše tshela ba etšwa mmogo, Pilusa a kgopela Tshidi gore a mo nyale. Aowa, magadi a ntšhiwa gomme dinama tša lewa. Gwa feta dikgwedi di sekae gomme Pilusa a aga ntlo kua motseng wa Tlamela kgauswi le Lekhureng. Ga se gwa feta lebaka le letelele gomme Pilusa a thoma go boulelwa. O be a sa rate ge Tshidi a etelwa ke bagwera ba banna. O be a re ba ratana naye.

Ke be ke le tseleng ya go ya lebenkeleng gomme ka kwa sello sa mosadi ka ngwakong. O be a goeletša ka lentšu le legolo. Ke ile ka kitima ntle le go nagana gore e ka be e le eng gomme ka tsena ka motseng woo. Ke ile ka humana monna a betha mosadi ka lepara. Batho ba bantši ba be ba lebeletše go se yo a lekago go lamola. Yo mongwe le yo mongwe a re ga se molato wa gagwe ge baratani ba elwa.

Molato ke eng? O reng a betha mosadi? Mosadi ga a bethwe, ka botšiša.

Yeo ga se taba ya gago. O tlogele go šunya dinko mererong ya batho. Ke lena le dirago gore basadi ba nyatše banna ba bona. Monna yola o kgala mosadi wa gagwe, yo mongwe wa batho bao ba bego ba hlaletše a nkgalema.

Monna yola o tla go thuntšha. Gape ke lešole. O se ke wa tsena ka ntlong, yo mongwe a mo tlaleletša.

Ke ile ka tsena ka ntlong gomme ka leka go mo rapeletša.

O reng o betha mosadi wa gago?

Ga se wa nnyalela mosadi. O ka se ke wa mpotšiša ge ke kgalema mosadi wa ka. Gape ebile ke mo nyetše ka tšhelete ya ka, nka dira sengwe le sengwe seo ke se ratago ka yena. Le wena wa gago mosadi o mo kgala ka moo o ratago.

Afa o a tseba gore o tla ya kgolegong ka seo o se dirago? Mosadi ga a kgalengwe ka lepara, ka mo eletša.

E sa le basadi ba boa Beijing gomme ba fetogile. Wa ka mosadi ke sa tlile go mo papatla ge a sa ntheeletše. Ga go monna yoo a ka dumelelago mosadi wa gagwe a etelwa ke bašemane ka motseng wa gagwe, a bolela bjale a etšwa gomme a ntlogela le mosadi wa gagwe ka šala ke lebelelane naye ka mahlong.

"Le reng le elwa?