Vaadakai Devathai

19

1

டென்னீஸ் பந்து ஆட்டத்துக்கு டென்னீஸ் என்று பெயர் வரக் காரணம் என்ன? எகிப்தில் உள்ள ஒரு நகரத்துக்குப் பெயர் டென்னீஸ். அந்த நகரத்தில்தான் டென்னீஸ் பந்துகளை செய்யக் கூடிய ரப்பர்தன்மையோடு கூடிய நூலிழைகள் தயாரிக்கப்பட்டன. எனவே அந்த ஆட்டத்துக்கு டென்னீஸ் என்ற பெயர் ஏற்பட்டது.

"வணக்கம் நேயர்களே! இது உங்கள் ‘ஸ்கை’ டி.வி.

தொலைக்காட்சிப் பெட்டிக்கு முன்பாய் உட்கார்ந்து நிகழ்ச்சியைப் பார்த்து ரசிக்க காத்துக் கொண்டிருக்கும் லட்சோப லட்சம் நேயர்களுக்கு ‘ஸ்கை’ டி.வி.யின் புத்தாண்டு வாழ்த்துக்கள். அடுத்த சில விநாடிகளில் டென்னீஸ் வீராங்கனை குந்தவை நேரடி ஒளிபரப்பில் தோன்றி, நீங்கள் கேட்கும் கேள்விகளுக்கெல்லாம் பதில் சொல்லப் போகிறார். அவரைத் தொடர்பு கொண்டு கேள்வி கேட்க விரும்புபவர்கள் இந்த எண்களுக்கு டயல் செய்யுங்கள்...!"

டி.வி. காம்பியர் பெண்ணின் முகம் சில விநாடிகள் காணாமல் போக, திரையில் டெலிபோன் எண்கள் தெரிந்தன.

டி.வி.க்கு முன்பாய் உட்கார்ந்து தலையணையை அணைத்தபடி சோபாவுக்கு சாய்ந்திருந்த நீலவண்ணக் கண்ணன், சட்டென்று தன் சட்டைப் பையில் இருந்த பால்பாயிண்ட் பேனாவை எடுத்து திரையில் தெரிந்த டெலிபோன் எண்களை இடது உள்ளங்கையில் குறித்துக் கொண்டான்.

பத்தே விநாடிகளில் காம்பியர் பெண்ணின் முகம் மறுபடியும் புன்னகையோடு திரையில் தோன்றியது.

நேயர்களே...! டென்னீஸ் வீராங்கனை குந்தவையைப் பற்றி உங்களுக்கெல்லாம் நான் சொல்ல வேண்டியது இல்லை. இன்றைக்கு இந்தியாவில் உள்ள எந்த நாளிதழைப் புரட்டினாலும் சரி, வார இதழைப் புரட்டினாலும் சரி, அதில் குந்தவையின் முகம்தான் இருக்கும். தமிழ்நாட்டில் உள்ள கிராமம் ஒன்றில் சாதாரண குடும்பத்தில் பிறந்த குந்தவை இன்றைக்கு உலக அளவில் பேசப்படும் டென்னீஸ் வீராங்கனை. இந்த வருட தீபாவளியை குந்தவையோடு சேர்ந்து நீங்கள் கொண்டாட வேண்டும் என்பதற்காகவே ஸ்கை டி.வி. இந்த நேரடி நிகழ்ச்சியை ஏற்பாடு செய்துள்ளது. இனி நேயர்கள் தங்கள் கேள்விக் கணைகளைத் தொடுக்கலாம்... காம்பியர் பெண் பேசி முடித்ததும் காமிரா மெல்ல நகர்ந்து, குந்தவையை மையைம் கொண்டது.

இருபது வயதே நிரம்பிய குந்தவைக்கு உண்மையிலேயே குங்குமப்பூ நிறம். அடர்த்தியான சுருள் முடியை உயரத் தூக்கி கொண்டை போட்டிருந்தாள். இயற்கையான புருவங்களுக்கு கீழே பெரிய கண்கள். பார்க்கும் பார்வையில் மின்சாரம். இரு காதுகளிலும் ஊஞ்சலாடும் பொன் வளையங்கள்.

வரிசை பிறழாத பற்களைக் காட்டி,வணக்கம் சொன்னவள் பேச ஆரம்பித்தாள்.

நான் இன்றைக்கு டென்னீஸ் விளையாட்டின் மூலம் பிரபலமாகியிருக்கிறேன் என்றால் அதற்கு உங்களைப் போன்ற அன்புள்ளம் கொண்டவர்களின் ஆதரவும், இறையருளும்தான் காரணம். நான் இப்போதும் எல்லோரையும் போல் ஒரு சாதாரணப் பெண்தான். எனக்கு டென்னீஸ் விளையாடத் தெரிந்து இருக்கிறது என்கிற ஒரே ஒரு விஷயம்தான் எக்ஸ்ட்ரா. இப்போது நான் டென்னீஸ் விளையாட்டில் உலகத்தர வரிசையில் 59வது இடத்தில் இருக்கிறேன். இந்த எண்ணிக்கையை நான் குறைக்க வேண்டும். முதல் இடத்துக்கு வராவிட்டாலும் கூட டாப்-10ல் ஏதாவது ஒரு எண்ணைப் பிடிப்பதே என் லட்சியம். டி.வி. நேயர்கள் என்னிடம் பேசவும், கேள்விகளைக் கேட்கவும் ஆர்வமாய் இருப்பீர்கள். இப்போது நீங்கள் கேள்விகளைக் கேட்கலாம்...

உடனே டெலிபோன் கிணுகிணுத்தது. ஒரு பெண் குரல் கேட்டது. ஹலோ குந்தவை...

யாரு...?

நான் காமினி... திருவண்ணாமலையிலிருந்து பேசறேன். உங்களுக்கு என்னுடைய புத்தாண்டு வாழ்த்துக்கள்...

உங்களுக்கும் என் இனிய புத்தாண்டு வாழ்த்துக்கள். இன்னிக்கு முதல் காலரான நீங்க என்கிட்டே என்ன கேள்வியை கேட்கப் போறீங்க...?

இந்த டென்னீஸ் விளையாட்டில் உங்களுக்கு எப்படி ஆர்வம் ஏற்பட்டது...?

நான் ஸ்டெபிகிராபியின் ரசிகை. டி.வி.யில் அவருடைய ஆட்டத்தைப் பார்க்கும் போதெல்லாம் இவரைப் போல் நாம் ஏன் டென்னிஸில் புகழ்பெறக் கூடாது என்று நினைப்பேன். பள்ளியிலும், கல்லூரியிலும் கிடைத்த வாய்ப்புகளை பயன்படுத்திக் கொண்டு டென்னீஸ் விளையாடினேன். நான் நன்றாக விளையாடுவதைப் பார்த்து என்னுடைய பி.டி. மாஸ்டர் எனக்கு தனிப்பட்ட முறையில் கோச்சிங் கொடுத்து மாவட்ட அளவிலான டென்னீஸ் மேட்சுகளில் ஆட வைத்தார். அதில் பெற்ற வெற்றிகளைத் தொடர்ந்து மாநில அளவிலான மேட்சுகளில் ஆடி அதில் சாதனைகளை நிகழ்த்தியபின் விம்பிள்டனில் விளையாட தங்கமான ஒரு வாய்ப்பு கிடைத்தது. முதல் ஆட்டத்திலேயே டென்னீஸ் தர வரிசையில் ஒன்பதாவது இடத்தில் இருந்த ஸ்வீடன் நாட்டைச் சேர்ந்த ‘நாடியா’வை தோற்கடித்து டி.வி. மூலமாகவும், ப்ரஸ் மீடியா மூலமாகவும் ஒரே ராத்திரியில் எல்லோர்க்கும் தெரிந்தவளாகிப் போனேன். விம்பிள்டனில் ப்ரீ க்வார்ட்டர் ஃபைனல் வரைக்கும் முன்னேறினேன். அடுத்து பிரெஞ்ச் ஓபன் போட்டியில் பங்கெடுத்துக் கொண்டு செமி ஃபைனல்ஸ் வரைக்கும் முன்னேறினேன். இதன் காரணமாக இப்போது டென்னீஸ் தர வரிசையில் நான் இப்போது 59வது இடத்தில் இருக்கிறேன்...

அடுத்த காலர் ஒரு ஆண். சென்னை நங்கநல்லூரிலிருந்து பேசினார். இப்படியொரு புகழ் உங்களுக்கு கிடைக்கும் என்று நினைத்தீர்களா...?

டென்னிஸில் புகழ்பெற வேண்டும் என்று நினைத்தேன். அதற்காக உழைத்தேன். கடவுளின் அருளும் இருந்ததால் புகழ், பெயர் கிடைத்தது...

டி.வி.யைப் பார்த்தபடியே- நீலவண்ணக் கண்ணன் குந்தவையிடம் பேச டெலிபோன் எண்களை தட்டிக் கொண்டிருந்தான். லைன் கிடைக்கவில்லை. மூன்றாவது காலர் மீண்டும் ஒரு பெண்.

நீங்கள் பார்க்க ஒரு சினிமா நடிகை மாதிரி அழகாய் இருக்கிறீர்கள். சினிமாவில் நடிக்க வாய்ப்பு கிடைத்தால் நடிக்கும் எண்ணம் உண்டா...?

கிடையவே கிடையாது! என்னுடைய எண்ணம் பணம் சம்பாதிப்பதில் இல்லை- இந்தியாவை டென்னீஸ் அரங்கில் உயர்ந்த ஒரு நிலைமைக்கு கொண்டுவர வேண்டும் என்பதில்தான்! சினிமாவில் நடிப்பதற்காக பணத்தைக் கொண்டு வந்து கொட்டிக் கொடுத்தாலும் சினிமாவில் நடிக்க ஒப்புக் கொள்ள மாட்டேன்...

எதனால் சினிமா வேண்டாம் என்று சொல்கிறீர்கள்?