Ang Ika Anum nga Estasyon SI JESUS NATUMBA SA IDALUM SANG MABUG-AT NGA KRUS LIDER: Nagasimba kg nagadayaw

kami sa Imo, O Kristo TANAN: Kay bangud sang Imo Balaan nga krus gintubos mo ang kalibutan. LIDER: Ang aton Ginoon Jesukristo nadagpa tungod sg kabug-at sang krus nga iya ginapasan. Ang Ginoo dili lamang ginabug-atan sang krus nga iya ginadala kundi siya ginabug-atan man tungod sang dili pagkamatiuohon sang kadam-an nga mga tawo nga nagayaguta kg nagapasipala sa iya. Ang mga tawo sa baylo nga magkaluoy sa iya nga makahalunosbo nga sitwasyon nagdugang pa gd ila kaakig kg walay pagtuo sa Dios. (Magdulog sang makadali para sa malinong nga pagpamalandong) LIDER: Pangamuyo O Ginoong Jesus, sa imo pagkadagpa didto sa dalanon pakadto sa kalbaryo, ginpakita mo amon ang amon pagkahuyang. Dili lipod sa imo kaalam nga kami nagkulang sa pagdampig sa tawhanon nga kabuhi paagi sa amon walay kakusog sa pagpaninguha sa pagpamatok sa mga hikot sg mga tawo nga nagapatingayon sg Kultura sg Kamatayon. Nagkalimot kami nga Imo mga kaanakan sa pag-angkon sg espritwal nga kusog paagi sa pagpangamuyo. Ihatag sa amon Ginoo ang bugay agud padayon kami nga magkabalaka sa amon isig katawo. Kag dili magpatumbaya sa pagbulig sa kaluyahon sg iban. (Isa ka Amay Namon, Maghimaya Ka Maria kg Himaya sa Amay) LIDER: Ginoo, nakasala kami kg nagahinulsol kami TANAN: Malooy ka sa amon.

Ika-Siyam nga Estasyon SI JESUS GINLANSANG SA KRUS

LIDER: Nagasimba kg nagadayaw kami sa Imo, O Kristo TANAN: Kay bangud sang Imo Balaan nga krus gintubos mo ang kalibutan. LIDER: Ang Pagbasa sg Santos nga Ebanghelyo suno kay San Lucas (Lucas 23:33 35) Sa pag-abot nila sa duog nga ginatawag Bagol, ginlansang nila Sia sa Krus, upod ang mga kriminal, ang isa sa Iya tuo ka gang isa sa Iya nga wala. Nagsilinign si Jesus, Amay, patawara sila, kay wala sila makahibalo sang ila ginahimo. Kag nagpagabutgabot sila sa pagbinahinbahinan sang Iya bayo. Ang mga tawo nagatindog didto sa pagtan-aw samtang ginayaguta Sia sang mga opisyales sa pagsiling, Ginluwas Niya ang iban, abi ipaluwas man sa Iya ang Iya kaugalingon, kon Sia gid ang Kristo sang Dios, ang Pinili. Ang Ebanghelyo sang Ginoo Lider: Pangamuyo O Ginoong Jesus sa Imo pagkamatimunanon sa Kabutbut-on sg Imo Amay ikaw ginlansang sa Krus kaupod sg mga kriminal. Sa Imo kauluoy ikaw nagbaton sg pangamuyo sadtong kriminal nga naghinulsol tungod sa Imo Diosnon nga paghigugma sa mga makasasala nga Imo gintawag sa paghinulsol. Ssa madamo nga mga tini-on kami padayon nga nagalansang sa Imo sa Krus sa Kalbaryo paagi sa amon mga pagpatuyang, ilabi na paagi sa pagpatay sg mga kabataan sa tagu-angkan sg ila mga iloy kg sa pagpangita sg irresponsible nga lawasnon nga pagpangalipay. Ginoo paagi sa imo Krus ginpakita mo sa amon ang matuod-tuod nga paghigugma nga handa mag-antos para sa kaayuhan sg tanan. Tudloi kami sa pagangkon sini sa amon nga pagpanagbuhi. (Isa ka Amay Namon, Maghimaya Ka Maria kg Himaya sa Amay) LIDER: Ginoo, nakasala kami kg nagahinulsol kami TANAN: Malooy ka sa amon.