Tanya : Pemanah enti semua jaku injau ari Jaku English disepil ngena polisi injau terus

iya nya nembiak enda mudah saru ke chara nyepil leka jaku taja pan iya disebut nitihka
kaul dilah Iban.

Sama baka atur ti nginjau jaku Melayu, leka jaku ti diinjau, diambi sereta diterima enggau silik
ari jaku asal. Reti nya iya nadai berubah ari segi sepil enggau reti taja pan disebut nitihka kaul
dilah Iban. Nya alai, pekara tu ngemudahka bala nembiak meretika guna sereta reti leka jaku ke
diinjau ari jaku Melayu tauka jaku English. Ukai semina ngagai nembiak aja, tang sida ke tuai
mega tau mudah deka meretika guna sereta reti leka jaku ke diinjau nya. Pengawa nginjau jaku
bukai nitihka atur sistem sepil jaku Iban bisi ngembuan pemanah enggau pengelemi iya empu.

Keterubah iya, pemanah enti sema nginjau ari jaku English ti disepil ngena polisi injau terus
ulih nambahka leka jaku Iban. Leka jaku ti semina bisi ba jaku English ulih diinjau terus ngagai
jaku Iban lalu pengawa tu tau nambahka agi leka jaku Iban. Leka jaku tu ulih dikena nambahka
penemu bala nembiak begunaka leka jaku injau tu tadi taja pan disebut ngena kaul dilah Iban.
Chunto, signature ti dibali nyadi leka jaku Iban mai reti tanda jari tang enda engkeman dikena
ba sesebengkah karang tauka ba pengawa nulis ti bukai. Nyadi, pengawa nginjau jaku English
tu tadi tau ngerembaika jaku Iban lalu nambahka leka jaku Iban ngambika tau mansang seraris
enggau bansa bukai.

Nambah ke nya mega, leka jaku ti diinjau sereta disepil ngena leka jaku asal ulih
ngemuntangka nembiak meretika leka jaku nya. Leka jaku ke disepil ngena leka jaku ti sama
enggau jaku asal tu mega ngemuntangka nembiak nguna leka jaku nya ba pengawa nulis
karang tajapan iya disebut ngena kaul lidah Iban. Chunto iya baka leka jaku bank, chairman
enggau ti bukai. Lebuh ngaga karang, leka jaku nya tadi endang patut bendar ditulis ngena sepil
asal iya ngambika pengajar ti nyimak iya enda saru penemu. Ari nya, isi ti deka dipadahka
dalam sesebengkah karang nya tau datai nitihka pekara ti deka dipadahka. Nya alai, pengawa
nginjau jaku tang disepil ngena polisi injau terus patut bendar dikemeratka dalam sistem pelajar
sekula.

Nangkanka nya, pengawa nginjau jaku ari jaku bukai mega bisi pengelemi iya nya identiti
penulin jaku Iban deka lenyau. Kebuah pia, orang tuai ti nadai pelajar tauka sekula tinggi enda
ulih nyebut leka jaku ti diinjau enggau chara ti engkeman. Chunto leka jaku ti diinjau iya nya
standard enggau term. Orang tuai tusah ka nyebut jaku tu laban sida enda kala ninga tauka
nyebut leka jaku tu laban pengidup sida ti diau ba rumah panjai jarang begunaka leka jaku ti
diinjau nya. Nya alai, nembiak kemaya hari patut ngajar bala ini enggau aki sida ngambika sida
nemu sereta enda tinggal laban pemansang dunya.

Disimpulka enggau jaku pandak, pengawa nginjau nitihka polisi injau terus tu bisi
ngembuan pemanah enggau pengelemi. Taja pia, nginjau jaku ari jaku bukai nengah polisi
injau terus ngenataika mayuh agi pemanah ngagai sistem sepil jaku Iban. Ambika jaku Iban
terus mansang ke mua baka jaku bansa bukai, pengawa tu manah bendar diteruska. Nembiak ti
belajarka jaku Iban mega mudah meretika leka jaku ti diinjau laban bisi belajarka leka jaku nya
ba mata pelajar ti bukai. Nya alai, nembiak rebak baru patut bisi ngembuan pengerindu
belajarka jaku Iban ngambika nemu pasal sistem sepil jaku Iban sereta enda ngaga penyalah
lebuh maya sida ngaga karang ba sekula.