Moscopole 2010

Nasi Calenţaru

Va sã zburãscu aua ti andamusea di eastanu andreaptã tu dzuua di

Stã’Mãrii, ditu unã mutritã cama apucheatã di suflitu. Prota entipusi tsi nj-u adrã
Moscopole fu di unã mushuteatsã ascurã, nj-pãrea un locu niheamã ca uscatu sh-
ahoryea di tutu tsi aveamu vidzutã tu alti pãrtsã ali Evropã. Dzuuã di dzuuã,
anarga-anaga, Moscopole nj-si dizvãrti dininti cu unã mushuteatsã tsi mash tu yisi
pots s-u ducheshtsã.
Andridzerli ti unã ahtari mari andamusi caftã fãr’ di altã, multu copus. Di
itia cã earam nãuntru tu pareia di andridzeari, putui cama lishoru s-vedu pãrtsãli
buni, cum sh-atseali tsi putea s-hibã cama uidisitu arãdãpsiti. Ti ciudii, tora anda
shedu sh-duchimãsescu s-aducu aminti atseali lucri tsi putea s-hibã adrati cama
ghini, vedu cã nu eara bash multi, canda tora nu mata au ahãtã simasii. Nj-yinu tu
minti cama multu mushutetsli, cum sh-alti njits lucri tsi anda s-featsirã, nu para lã
bãgaiu oarã.
Ducchiiu cum muzica, giocurli sh-sumarãslu di pi prosuplu a njilji di
oaminj s-avea himusitã irushi tu kimatli a suflitlui a meu sh-vrea sã-shi ducã bana
tu inima a mea....tuti s-pãrea ca tu un pirmith.
Fãr’ di altã, andamusea di Moscopole - ashi cum u duchiiu io – fu unã
apuhii ti unã ahãndoasã siluyisiri tu tsi mutreashti mira a popului armãnescu.
Minduescu cã ahtãri ducheri, di dultsi cutrimburari cu mintea la strãpãpãnj,
lipsescu bãnati tu singurami sh-canda pirmitusearea i anyrãpsearea a loru lã scadi
niheama ditu fanã. Dip ca atumtsea anda un mistico i un lucru multu aproapea di
suflitu easti pirmitusitu iara sh-iara, para-spunearea ducãndalui cãtã aspãrdzearea a
mãyiiljei.
 Sh-tu bitisitã ducheshtsã cã bãnashi tsiva multu ‘msheatu sh-ahundosu sh-
cã aestu lucru - tu ptsãnu i lungu chiro - va s-iasã tu miydani cu unã silã multu
mari.
Sticurli ‘msheati tricuti Moscopole, sutsata ligatã aclo cu altsã tiniri,
mushuteatsa a loclui, mi turnipsirã tu unã turlii tsi nu mindueam cã poati s-facã
vãrnã oarã. Mi turnaiu di aclo cu unã cama limbidi mindueari tu tsi mutreashti
atsea tsi hiu. Potu s-aspunu cã fu unã stãmãnã di “auto”-cãnushteari.