Ina Therese R.

Ardan GEFILI2 EN1 Nobyembre 11, 2018

ABSTRAK Dr. Fortunato
Nakita ng mga manunulat ng papel na ito ang pagiging hindi pamilyar ng mga Pilipino sa
konsepto ng internasyonalisasyong akademiko. Kaya naman namuo rin ang akala ng karamihan
na ang tamang daan tungo sa internasyonalisasyon ay ang pagkiling sa wikang Ingles sa halip na
sa sariling wikang pambansa, ang Filipino. Mula sa mga suliraning ito ay nagkaroon ng tatlong
layunin ang mga awtor. Una, ang makapagbigay ng functional na kahulugan ang
internasyonalisasyong akademiko; pangalawa, ang makapagmungkahi ng angkop at sustenableng
paraan upang maitaguyod ito; at panghuli, ang maipaliwanag at maipakita ang kahalagahan ng
Filipino sa paraan ng pagtataguyod nito. Upang matalakay ang mga ito, hinati nila ang papel sa
apat na seksyon: tungkol sa kahulugan ng internasyonalisasyong akademiko, sa halaga ng
pananaliksik sa internasyonalisasyong akademiko, sa kahusayan sa pananaliksik at konsepto ng
pamantasang pansaliksik, at sa ilang usapin kaugnay ng wikang Filipino at pananaliksik.

Nagsimula sila sa paglilinaw kung ano nga ba ang kahulugan ng internasyonalisasyong

akademiko--“pagtaya sa kahusayan ng isang pamantasaan sa konteksto ng mahuhusay na
pamantasan sa loob ng bansa.” Isinukat nila ang estado ng Pilipinas sa larangan ng
internasyonalisasyong akademiko sa pamamagitan Scopus-Elsevier at ng QS University
Rankings: Asia. Dito ay nabigyang-diin din ang kahalagahan ng kakahayan sa pananaliksik ng
mga pamanatasan upang makapagtamo ng mas mataas na puntos sa mga pamantayan ng QS
University Rankings: Asia.

Ang konsepto ng pamantasang pansaliksik ay nagmula kay Humboldt na taga-Aleman.

Umusbong at lumago ang konseptong ito sa panahon na nasa ilallim pa rin ng kolonyalismo ang
bansang Pilipinas. Itinuturo nila itong salarin kung bakit hindi laganap ang mga pamantasang
pansaliksik sa Pilipinas. Dahil din sa kolonyalismong pag-iisip ay Ingles ang midyum ng
instruksyon at pananaliksik sa Pilipinas; nagiging hadlang ito sa diseminasyon ng karunungan sa
mga kapwa Pilipino. Kaya naman ay iminungkahi ng mga manunulat na sa halip na nakatuon
tayo sa paglikha ng karunungan sa ibang wika ay mas bigyang-pansin ng mga pamantasan at
mga institusyon ang pagsusulat sa sariling wika. Ginamit nilang halimbawa ang ilang mga
karatig na bansa sa ASEAN, upang mapagtibay ang papel ng pambansang wika sa pagpapaunlad
ng karunungan ng isang bansa. Isa nga sa mga makatutulong upang mahikayat ang paggamit ng
sariling wika sa larangan ng pananaliksik ay ang pagbuo ng sariling journal citation index, kung
saan ay mas magiging malaya din ang mga mananaliksik at manunulat na Pilipino.

Kung pagsusumahin, sinabi ng mga manunulat na ang pagkamit ng internasyonalisasyong

akademiko ay dapat na nakatuon sa pagpapahusay ng pamantasan, at malaki ang bahagi ng
pananaliksik sa larangang ito. Subalit isa sa mga sanhi kung bakit hindi makasabay ang Pilipinas
sa tagisang ito ay dahil sa estado ng kolonisasyon sa Pilipinas noong panahon ng pagpapalaganap
ng konsepto ng pamantasang pananaliksik sa mundo. Dahil dito ay nahadlangan ang parte ng
wikang Pilipino bilang midyum ng malalim na pag-iisip, lalo na sa larangan ng pananaliksik. Isa
sa mga solusyon na kanilang inirekomenda ay ang pagbuo ng sariling journal citation index na
tatangkilikin at pauunlarin ng mga pamantasan, CHED, pamahalaan, mga guro at mananaliksik.

Napapanahon ang paksang ito dahil tunay ngang hindi laganap ang kaisipan ng pananaliksik
at mga pamantasang pansaliksik sa Pilipinas. Masasabi natin na karamihan sa mga Pilipino ay
kontento nang ipaubaya ang paglikha ng karunungan sa ibang mga bansa. Maaaring bunga nga
ito ng kaisipang kolonyal na umiiral pa rin sa ating mga kababayan. Sa kabila ng malaya na ang
Pilipinas sa mga mananakop ay nananatili pa ring alipin ang tingin nila sa kanilang mga sarili, sa
paraan na hindi nila nakikita ang kakayahan o posibilidad na sila rin ay makapagtaguyod ng
kanilang mga ideya at makabagong mga kaisipan sa mundo at maipagmalaking mula ito sa isang
Pilipino.

Nakatutulong din ang papel na ito upang mahikayat ang mga Pilipino sa larangan ng
internasyonalisasyong akademiko, sa pamamagitan ng pagpapaunlad ng pananaliksik sa Pilipinas
at paggamit ng wikang Filipino bilang pangunahing midyum tungo sa kaunlarang ito.