MIZORAM INSTITUTE OF MEDICAL EDUCATION & RESEARCH

Mizoram Institute of Medical Education & Research (MIMER) hi Centrally Sponsored

Scheme “Establishment of medical college attached with existing district/referral hospitals”
hnuaia din niin, a project cost hi Rs. 189 crores a ni a, 90:10 funding a ni. Hemi scheme
hnuaiah hian first phase ah hospital dang 58 rualin State Referral Hospital, Falkawn chu thlan
ve a ni a. Government of India leh Government of Mizoram te chuan hemi atan hian 16th
May, 2014 khan Memorandum of Understanding an sign a ni.
He CSS hnuaia fund kalna tura duan chu hetiang hi a ni :
Sl.No. Head Amount
1. Building for Medical College Rs.69 crores
2. Hostel for students/faculty Rs.40 crores
3. Equipment Rs.50 crores
4. Upgradation of district hospital Rs.30 crores
Total Rs. 189 crores

Hemi project atana Consultancy firm turin HSCC (INDIA) Ltd. te chu 25th June, 2015
khan thlan an ni a, anni hnuaia contracting agency te chuan October, 2015 khan hospital
chei that hna an thawk zui nghal a ni. He project hnuaiah hian hospital building awmsa chei
that bakah, Academic building sakna tur a tel a. Tin, he project atang hian equipment
engemaw zat hospital thuam changtlun nana lei a ni bawk.

Medical College din phalna application hi MCI ah tum li (4) thehluh a ni a. A

vawikhatna atan 29th August, 2014 khan seat 50 awm thei turin dilna thehluh a ni a.
Application chu pawm ni lo in, Govt. of India nena MoU angin seat 100 awm theihna dil tura
hriattir kan ni.
A vawi hnihna atan seat 100 awm theihna tur application chu 31st August, 2015 khan
thehluh leh a ni a. Hetah hian faculty te leh infrastructure te duhthusam a la awm loh avangin
application chu hnawl a ni leh a ni.
Application form hi a vawi thumna atan 5th July, 2016 khan thehluh leh a ni a. Hemi
tum hian application chu pawm niin, MCI lam atang inspection 5th & 6th January, 2017 khan
an rawn nei a ni. Hemi tum pawh hian faculty an la awm loh avangin medical college din
phalna chu pek kan la ni leh rih lo a ni.
A vawi lina atan application form hi 5th July, 2017 khan thehluh a ni leh a. MCI lam
atangin 21st & 22nd November, 2017 khan inspection an rawn nei leh a. Hetah hian kan la tlin
lohna te point hrang hrang 27 an hmu a. Heng kan tlin lohna te hi thla thum chhunga tih fel
a nih chuan medical college hawn phalna pek a nih theih thu an sawi nghal bawk a ni.

Sorkarin theih tawpa hma la in, MIMER tan post 629 a create a ni. Council of Ministers
in an remtih angin MIMER Director atan Prof. L. Fimate chu 27th October, 2017 khan
appointment pek a ni a. Single Window Clearance Committee, MIMER tan bika din chuan
post 409 hnawh khah phalna 21st December, 2017 khan a pe a. Deputation hmangin Faculty
leh Residents a theih ang ang hnawh khah nghal a ni a. Tin, MPSC kaltlangin, February leh
March 2018 ah Faculty 32 leh Residents 26 te lak an ni bawk.
Hemi hnu hian MCI ah college endik leh tura dilna chu 6th February, 2018 khan
thehluh a ni a. Kan tlin tawk lohna an tih point 27 te rawn endik lehna chu MCI in 4th April,
2018 khan an rawn nei a ni.
MCI chuan Mizoram sorkar hmalakna chu tha tawk tiin, 15th May, 2018 khan medical
college hawn phalna, Letter of Permission hmu thei turin recommendation Ministry of
Health & Family Welfare (MoHFW) ah a thawn a. MoHFW hian MIMER tan seat 100 awmna
medical college hawn phalna chu 25th May, 2018 ah a rawn pe ta a ni.

Seat hi 15% All India Quota atan central in an hauh a. 15% dang leh hi NRI quota atana
dah niin, a bak 70% hi State quota a ni thung. State quota hnuaia seat sem dan hi Higher &
Technical Education Department kutah dah niin, NEET score-a an tih that dan in dawtin seat
hi pek an ni. Tunah hian academic session 2018-19 atan student 99 admit an ni a. A hnuaia
mi ang hi category tina student admit zat details chu a ni :
All India Quota – 15
NRI Quota – 14
State Quota – 70
Total - 99
Girls – 59, Boys - 40

MIMER hi August ni 7, 2018 khan a hawnna program neih niin, a tuk August ni 8, 2018
atang class lak tan nghal a ni.

Tunah hian 1st renewal of permission tana inbuatsaihna a kal mek zel a. 1st renewal
atana inspection hi 5th & 6th December, 2018 khan neih niin, hetah pawh hian MCI duh dan
ang faculty zat kan neih loh avangin, thla khat chhunga an duh khawp lohna te ti fel turin
hriattirna pek kan ni a. Inspection April 2019 thla chhunga neih leh tur a ni.

MCI danah hian kumtinin infrastructure leh staff mamawh zat hi, a kum 5-na
recognition a hmuh hma chu a pung zel a. Hemi avang hian MCI lam hian kumtin endik hna
an rawn nei thin a. He endikna ah hian kan tlin loh chuan permission hi cancel theih niin,
student thar admit pawh phal a ni lo thin a ni. Hemi avang hian MIMER chungchanga hna
awm reng reng, recruitment te, procurement te leh construction te hi a rang thei ang bera
tih fel zung zung a ngai a. Department dang anga muang changa kal theih a nih loh avangin,
MIMER tan bik hi chuan sorkar dan pangai zawm theih loh tum hi a awm fo thin a ni. Tin,
MCI lam hian an dan te an duan thar ve zel bakah, Board of Governors anga an awm hnu
hian an strict zual em em a. Tlin lohna reng reng ngaihdam theih loh a nih avangin, MIMER
hi tluang taka a kal zel theih nan, file tang te awm lo a, chak taka hmalak a ngai tak zet a ni.