Kra n yirman ed tenfaliyin i usishel n tmeslayt s tmaziγt yettusḥedqen

Sγur: D.Messaoudi

S tsebba n tnamit ay uγen Yimaziγen ttmeslayen s tutlayin tibeṛṛaniyin, tutlayt tamaziγt n wass-a
tejla aṭas n yirman ed tenfaliyin tinaṣliyin, d ayen yeğğan imatlayen imaziγen ur ttafen tikkwal
amek ara d-bdun ameslay, neγ amek ara t-kemmlen, neγ amek ara t-gerden. Umuγ-a d-yetteddun d
asekfel n yirman ed tenfaliyin tinaṣliyin yettwattun; d aseḥdeq n tiden-nni d-yettureḍlen s talγiwin
n tutlayt taγbalut : taεrabt. Umuγ-a ur yemmid ara ; netta d taruẓi n usalu i widen yebγan ad nadin
deg taγult-a i wakken ad d-skeflen imedyaten niḍen ara yessisehlen tutlayt s tmaziγt.

1. Γef waḥsab n … / γef wakk-n … (selon / d’après)

- Γef waḥsab n yigenni-a, iḍ-a ad d-yeγli wedfel.
- Γef wakk-n d-nnan yeγmisen, aselway n tigduda yenṭer.
2. I lmend n … (à titre d’exemple)
- Aṭas n tmukrisin ay d-nemmuger. I lmend n wawal, tidersi n wedrim d yiwet.
3. Ur … kan, maca ula … daγen … (non seulement, … mais aussi)
- Ur d adrim kan ay t-ixuṣṣen, maca ula d tazmert daγen.
4. Iḥun Ṛebbi … / Cwi-kan … (heureusement)
- Teγli-d tgejdit fell-as, iḥun Ṛebbi ur t-tḥuz ara.
5. D-acu-kan … (cependant / seulement)
- Yessen tamaziγt, d-acu-kan ur tt-yesseqdac ara.
6. D akken… / nwis (que)
- Ssutreγ deg-s kra n wedrim, yenna-yi-d d akken yerḍel-iten akk i medden.
- D akken ur d-yerri s wawal ur iyi-sewhem ara, imi netta d amagad.
7. Awi-d-ukan … (tant mieux)
- Yegrareb s tkeṛṛust-is, maca yemneε ur yemmut. Awi-d-ukan.
8. Ad yeg Ṛebbi … (que + subjonctif)
- Ad yeg Ṛebbi yejji umuḍin-nwen !
9. A-wer … (que … ne)
- A-wer aγ-d-iqis Ṛebbi s wayen nteg n yihwah.
10. Ad yeg Ṛebbi yedder … / yedder … (que vive / vive)
- Ad yeg Ṛebbi ddren yinifiyen !
11. Ad yeg Ṛebbi yeγli … / yeγli … (à bas)
- Ad yeg Ṛebbi yeγli unesbaṭli !
12. Hib … neγ … / ya … ya … (soit, … ou bien)
 - Fren kan yiwen webrid: hib ad tedduḍ yid-i, neγ yid-s.
- Snefraneγ-k gar sin yiberdan: ya ad tedduḍ yid-neγ, ya yid-sen.
13. Lidiw / aγerya / εiwaḍ (au lieu de)
- Lidiw ad ifak ameddakel-is, netta yerwel.
14. Ihayen / yirbeḥ (d’accord / OK)
- Yenna-yi-d ad nemlil azekka, nniγ-as ihayen.
15. Deg turda … / deg ṛṛay … (à mon avis)
- Deg turda-w, yessefk ad neg kra i weḥbas n urebrab.
16. Akk-n ttxemmimeγ nekk, … / akk-n cukkeγ nekk, … (je crois que)
- Akk-n ttxemmimeṣ nekk, yessefk ad nebdu tikli tura.
17. Yuwi-yi-d Ṛebbi … / Yeḥsab-iyi Ṛebbi … (j’ai l’impression que)
- Yuwi-yi-d Ṛebbi ilaq nebdu sya.
18. Wullen, … (et bien / bon)
- Acu ara d-tiniḍ deg uḍris-a ? Wullen, la ttwaliγ igerrez aṭas.
19. Akk-n yebγu yili, … (en tous les cas)
- Akk-n yebγu yili, yessefk ad nerzu fell-as.
20. Akk-n yebγu yili + isem (quelque soit)
- Akk-n yebγu yili wassif, yessefk ad t-nezger.
21. Maḍlani, … 1 (mondialement)
- Maḍlani, anaẓur-a ur yettwassen ara.
- Ur yettwassen ara unaẓur-a maḍlani.
22. Damsani, …2 (économiquement parlant)
- Damsani, nezmer ad d-nini d akken tamurt-a ad tt-id-temmager tezγent tameqqrant.

1. Nezmer ad d-nernu awalen niḍen am “digani” (localement), “sertani” (politiquement), atg.

2 . Ma deg tefṛansist ed tenglizit, qqaren (économiquement parlant / economically speaking), deg taεrabt qqaren kan
(‫ ; )سياسيا‬tanfalit n tmaziγt tebna ihi γef tmeggarut-a.